ކިޔެވް، ޔޫކްރެއިން (މޭ 3) - ރަޝިއާގެ ރައީސް ލެޑިމިއަ ޕުޓިން އަވަހާރަކޮށްލުމުގެ މަގުސަދުގައި ކްރެމްލިންއަށް ފޮނުވި ޑްރޯންތަކެއް ހުއްޓުވާފައިވާ ކަމަށް އެ ރަޝިއާއިން ބުނެފި އެވެ.
ރަޝިއާއިން ބުނީ އެ "ޓެރަރިސްޓު" އަމަލުގެ ފަހަތުގައި އޮތީ ޔޫކްރެއިން ކަމަށެވެ. އެކަމަކު ޔޫކްރެއިންގެ ރައީސް ވޮލޮޑިމިރް ޒެލެންސްކީ ވަނީ އެ ތުހުމަތު ދޮގުކުރައްވައިފަ އެވެ.
ރަޝިއާގެ ތަރުޖަމާނު ޑިމިޓްރީ ޕެސްކޯވް ދައުލަތުގެ ނިއުސް އެޖެންސީއަށް ވިދާޅުވީ ޑްރޯން ހަމަލާ ދޭން އުޅުނު ވަގުތު ޕުޓިން ހުންނެވީ ކްރެމްލިންގެ ރަސްމީ ގެކޮޅުގައި ނޫން ކަމަށެވެ.
މޮސްކޯ ނިއުސް ޓެލެގްރާމް ޗެނަލްގައި އާއްމުވި ވީޑިއޯއެއްގައި ފެންނަނީ ކްރެމްލިންއާ ދިމާލުން ބޯ ދުންތައް އަރާ މަންޒަރެވެ. ރިޕޯޓުތައް ބުނާ ގޮތުން އެކަން ހިނގީ ބުދަ ދުވަހުގެ ދަންވަރު އެވެ.
އިތުރު ވީޑިއޯއެއްގައި ފެންނަނީ ކްރެމްލިން ތެރޭގައި ހުންނަ ސެނެޓް ޕެލެސްގެ މަތިން ޑްރޯނެއް ގޮވައި އަލިފާން ގުޅައެއް ދިއްލޭ މަންޒަރެވެ.
ރަޝިއާ ސަރުކާރުން ބުނީ ޑްރޯންތަކުން ހަމަލާ ދިނުމުގެ ކުރިން ރަޝިއާގެ ސިފައިންނާއި ސަލާމަތީ ފައުޖުތަކުން އެ ޑްރޯންތައް ހުއްޓުވި ކަމަށާއި އެއްވެސް މީހަކަށް އަނިޔާ ނުވާ ކަމަށެވެ.
ހަމަލާގެ ތުހުމަތު ޔޫކްރެއިނަށް ކުރާ އިރު، އެ ގައުމުގެ ރައީސް ޒެލެންސްކީ އެކަން ދޮގުކުރައްވައި ވިދާޅުވީ "ޕުޓިން އާއި މޮސްކޯއަށް ހަމަލާ ނުދޭ" ކަމަށެވެ.
"އަޅުގަނޑުމެން ހަނގުރާމަ ކުރަނީ އަޅުގަނޑުމެންގެ ފަސްގަނޑުގައި. އަޅުގަނޑުމެން ހަނގުރާމަ ކުރަނީ އަޅުގަނޑުމެންގެ އަވަށްތަކާއި ސިޓީތަކުގެ ދިފާއުގައި."
ޔޫކްރެއިނުން ބުނީ އެފަދަ ދޮގު ތުހުމަތެއް ކުރުމުގެ ބޭނުމަކީ ޔޫކްރެއިންގައި އާއްމުން ދިރިއުޅޭ ހިސާބުތަކަށް ބޮޑެތި ވައިގެ ހަމަލާ ދިނުމަށް ކަމަށެވެ.
