އދ. އެމެރިކާ (މޭ 3) - ދުނިޔޭގައި ނޫސްވެރިކަމުގެ މިނިވަންކަން ހަނިވެ، ނޫސްވެރިންނަށް ޓާގެޓުކުރުން އިތުރުވެފައިވާ ކަމަށް އދ. ގެ އޮފިޝަލުންނާއި ނޫސްތަކުން ބުނެފި އެވެ.
މޭ ތިން ވަނަ ދުވަހު ފާހަގަކުރާ ބައިނަލްއަގްވާމީ ނޫސްވެރިކަމުގެ މިނިވަންކަމުގެ ދުވަހާ ދިމާކޮށް އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ގޮވާލެއްވީ ނޫސްވެރިންނާއި ނޫސްތަކުގެ ހައްގު ދިފާއު ކުރުމަށެވެ.
"އަޅުގަނޑުމެން އެންމެންގެ މިނިވަންކަން ބިނާވަނީ ނޫސްވެރިކަމުގެ މިނިވަންކަމުގެ މައްޗަށް،" އދ. ގެ މައި މަރުކަޒުގައި އޮތް ކޮންފެރެންސަކަށް ގުޓެރޭޒް ފޮނުއްވި ވީޑިއޯ މެސެޖެއްގައި ވިދާޅުވި އެވެ.
އޭނާ ވިދާޅުވީ ނޫސްވެރިކަމުގެ މިނިވަންކަމަކީ ޑިމޮކްރަސީ އާއި އިންސާފުގެ ބިންގާ ކަމަށާއި އިންސާނީ ހައްގުތަކުގެ ލޭނާރު ކަމަށެވެ. އެހެން ނަމަވެސް ނޫސްވެރިކަމުގެ މިނިވަންކަން ނެތެމުންދާ ކަމަށް ވިދާޅުވި އެވެ.
މި އަހަރުގެ ނޫސްވެރިކަމުގެ މިނިވަންކަމުގެ އިނާމު ޔުނެސްކޯއިން އެރުވީ އިރާނުގެ ތިން އަންހެނުންނަށެވެ. އެއީ ޖަލުގައި ބަންދުކޮށްފައި ހުރި ދެ ނޫސްވެރިއަކާއި އިންސާނީ ހައްގުތަކަށް ވަކާލާތު ކުރާ އެކްޓިވިސްޓެކެވެ.
ރިޕޯޓާޒް ވިތައުޓް ބޯޑާޒް ޖަމިއްޔާއިން ބުނާ ގޮތުގައު 2022 ވަނަ އަހަރު ވަޒީފާ އަދާކުރަމުން ދަނިކޮށް 55 ނޫސްވެރިންނާއި މީޑިއާގައި މަސައްކަތުގައި ޝާމިލުވާ ހަތަރު މީހުން މަރާލި އެވެ.
