މުޅިން އާ ބާވަތެއްގެ "ސައިކޯއެވްޓިކް" މަސްތުވާތަކެތި ދުނިޔޭގައި ދައުރުވަމުންދާ ކަމަށް އޮސްޓްރޭލިއާގެ ސައިންސްވެރިންގެ ޓީމަކުން ބުނެފި އެވެ.
ކުއީންސްލޭންޑް ޔުނިވާސިޓީގެ ޓީމަކުން ވަނީ 18 ގައުމެއްގެ ނަޖިސް ފެނުގެ ތަހުލީލުތައް ކޮށްފަ އެވެ. އެ ގައުމުތަކުގެ ތެރެއިން ޔޫރަޕާއި، އެމެރިކާ، ކެނެޑާ، ނިއުޒީލޭންޑް، އޮސްޓްރޭލިއާ، ޗައިނާ، ބްރެޒިލް އަދި ދެކުނު ކޮރެއާގެ 47 ސިޓީއެއްގެ ނަޖިސް ފެން ހިމެނެ އެވެ.
އެގޮތުން 2019 އިން 2022 އަށް ކޮންމެ އަހަރެއްގެ އާ އަހަރާ ދިމާކޮށް ސާމްޕަލް ނަގައި ޓެސްޓު ކުރަމުން ދިޔަ އެވެ. ތަހުލީލުން އެނގުނީ މުޅިން އާ 16 ބާވަތެއްގެ މަސްތުވާތަކެތި ގެންގުޅޭ ކަމެވެ.
އެ ތަހުލީލުތަކުން މަސްތުވާތަކެތީގެ އާ ބާވަތްތަކެއް ގެންގުޅޭކަން އެނގިފައިވާއިރު، އެ ބާވަތްތަކުން ކުރަނީ މިހާރު ވެސް އާންމުކޮށް މަސްތުވާން ބޭނުންކުރާ ބާވަތްތަކުން ކުރާ ފަދަ އަސަރެވެ. އާ މަސްތުވާ ތަކެތި އުފެއްދުމަށް ބޭނުންކޮށްފައި ހުރި ކެމިކަލް ސްޓްރަކްޗާ ތަފާތެވެ.
އެ ތަކެތި އުފައްދަނީ ވަރަށް ކުޑަ މިންވަރަކަށް ކަމަށް ވާތީ، އާއްމުކޮށް ފެންނަ މަސްތުވާތަކެއްޗަށް ވުރެ، އާ ބާވަތްތައް ހޯދައި ދެނެގަންނަން ފުލުހުންނަށް ވެސް އުނދަގޫވެ އެވެ.
"ނިއު ސައިކޯއެކްޓިވް ސަބްސްޓެންސް" (އެންޕީއެސް) ނުވަތަ މުޅިން އާ މަސްތުވާ ބާވަތްތައް ދުނިޔޭގެ ހުރިހާ ހިސާބެއްގައި ބޭނުންކުރަމުން ދިޔަ ނަމަވެސް، ވަކި ބާވަތްތައް ގިނައިން ފެންނަނީ ވަކި ސަރަހައްދުތަކުންނެވެ.
އަލަށް ފެނުނު 3-މެތީލްމެތްކެތިނޯން ޔޫރަޕުން 2019 ގައި ގިނައިން ފެނުނު އިރު، އެންމެ ގިނައީ ސްޕެއިން އަދި ސްލޮވާކިއާގަ އެވެ. އޭގެ ފަހުން އުތުރު އެމެރިކާ އާއި އޮސްޓްރޭލިއާ އަދި ނިއުޒީލެންޑަށް ފެތުރުނެވެ.
އޭގެ އިތުރުން އެމްފެޓަމައިން އާއި ބެންޒޯޑަޔަޒެޕީންސްއާ އެއް ކަހަލަ އަސަރުތައް ކުރާ ޕެނެތައިލަމައިންސް ވެސް ވަރަށް ގިނައިން ފެނުނެވެ.
މެފެޑްރޯން، އެތިލޯން އަދި ޔޫޓިލޯން ނަމަކަށް ކިޔާ އާ ބާވަތްތަކެއް ވެސް ދައުރުވަމުންދާ އިރު، އެއީ އެކްސްޓަސީ އަދި ކޮކެއިންއާ އެއް ކަހަލަ އަސަރުތަކެއް ކުރާ ބާވަތްތަކެވެ.
