ލިވަޕޫލް (މެއި 1) - އިނގިރޭސި ޕްރިމިއާ ލީިގުގައި ލިވަޕޫލުން ފަހު ވަގުތު ޓޮޓެންހަމް ހޮޓްސްޕާސް އަތުން މޮޅުވި މެޗަށް ފަހު ލިވަޕޫލްގެ ކޯޗު ޔާގެން ކްލޮޕް، އެ މެޗުގެ ރެފްރީ ޕޯލް ޓިއާނީއާ ބެހޭގޮތުން ދެއްކި ވާހަކައިގެ މައްސަަލަ އިނގިރޭސި އެފްއޭ އިން ބަލަން ފަށައިފި އެވެ.
މެޗުގެ އިތުރު ވަގުތުގައި ލަނޑު ޖަހައި، ޓޮޓެންހަމް އިން 3-3 އިން އެއްވަރުކުރި ރޭގެ މެޗުގައި ލިވަޕޫލުން އިތުރު ގޯލެއް ޖަހައިގެން މޮޅުވިއިރު، މޮޅުވި ގޯލަށް ފަހު ކްލޮޕް ވަނީ މެޗުގެ ހަތަރު ވަނަ އޮފިޝަލް ޖޯން ބްރޫކްސް ކުރިމައްޗަށް ގޮސްފަ އެވެ. އަދި ދުވެފައި ދިޔަ ވަގުތު، ކްލޮޕް އަށް ކޮންމެ ވެސް ވަރެއްގެ އަނިޔާއެއް ވެސް ވަނީ ވެފަ އެވެ.
އެ މެޗަށް ފަހު ކްލޮޕް ވަނީ މެޗުގައި އިންސާފުކުރި ރެފްރީ ޓިއާނީއާ ބެހޭގޮތުން ވެސް ވާހަކަ ދައްކައިފަ އެވެ.
"ޓިއާނީއާ އެކު އަހަރެމެންގެ ކަންތައްތަކެއް އެބަހުރި މާޒީގައި ހިނގާފައި، އެއްވެސް ކަމެއް ނެތޭ ޓިއާނީ ބުނި ކަމުގައި ވިޔަސް އަހަންނަށް ގަބޫލެއް ނުކުރެވޭ. އޭނަ އަހަންނާ ދިމާލަށް އެ ބަލާ ގޮތް އަހަންނަށް ކަމަކު ނުދޭ. ރަނގަޅު ވާހަކައެއް، އަހަރެން އުފާފާޅުކުރި ގޮތް ރަނގަޅެއް ނޫން. އެކަމަކު، އެ ވަގުތު ޓިއާނީ އައިސް އަހަންނާ ދިމާލަށް އެ ބުނި އެތި ބުނެފައި ރީނދޫ ކާޑު ދެއްކުން އޯކޭއެއް ނޫން،" ސްކައި ސްޕޯޓްސް އަށް ދިން އިންޓަވިއުގައި ކްލޮޕް ބުންޏެވެ.
އިނގިރޭސި ފުޓްބޯޅައިގެ ރެފްރީންގެ ކަންކަން ބަލަހައްޓާ، ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) އިން ބުނީ އިންޓަވިއުގައި ކްލޮޕް ދެއްކި ވާހަކަތަކާ ގުޅިގެން، އެ އިދާރާ އިން ވާނީ ރޭގެ މެޗުގައި ޓިއާނީގެ ކޮމިއުނިކޭޝަންތަކުގެ ރެކޯޑިން އަޑުއަހާފައި ކަމަށެވެ.
އަދި ރެކޯޑިން އެއްކޮށް އަޑުއެހިއިރު، އުސޫލާ ހިލާފަށް ޓިއާނީ ދެއްކި ވާހަކައެއް ނެތް ކަމަށާއި ފެނިގެންދިޔައީ "ޕްރޮފެޝަނަލް އުސޫލު" ކަމަށް ޕީޖީއެމްއޯއެލް އިން ވަނީ ބުނެފަ އެވެ.
އިނގިރޭސި އެފްއޭ އިން މިހާރު އަންނަނީ މެޗު ރިޕޯޓްގައި ޓިއާނީ ހިމަނާފައިވާ ބައެއް ކަންތައްތައް ބަލަމުންނެވެ. އަދި މި ކަމުގެ މައްސަލަ ބަލާއިރު، ކްލޮޕަށް ޑިސިޕްލިނަރީ ފިޔަވަޅެއް އެޅުމުގެ ފުރުސަތު ބޮޑެވެ.
