މޮސްކޯ، ރަޝިއާ (އެޕްރީލް 30) - ޔޫކްރެއިން ބޯޑަރު ކައިރީގައި އޮންނަ ރަޝިއާގެ އަވަށަކަށް ފަތިސް ވަގުތު ދިން ވައިގެ ހަމަލާއެއްގައި ހަތަރު މީހުން މަރުވެ ދެ މީހުންނަށް އަނިޔާވެއްޖެ އެވެ.
ރަޝިއާގެ ހުޅަނގު ބްރިޔާންސްކް ސަރަހައްދުގެ ގަވަރުނަރު އެލެގްޒެންޑާ ބޮގޮމާޒް ވިދާޅުވީ ހަމަލާ ދިނީ ޔޫކްރެއިން ބޯޑަރާ ހަތް މޭލު ދުރުގައި އޮންނަ ސުޒެމްކާ އަވަށަށް ކަމަށެވެ.
ބޮގޮމާޒް އެންމެ ފުރަތަމަ ވިދާޅުވީ ހަމަލާގައި މަރުވީ ދެ މީހުން ކަމަށެވެ. އެކަމަކު ފަހުން ޓެލެގްރާމްގައި ވިދާޅުވީ އިތުރު ދެ މީހުންގެ ހަށިގަނޑު ފެނިފައިވާ ކަމަށެވެ.
އޭނާ ވިދާޅުވީ ދަންވަރު ވަގުތު ދެ ފަހަރެއްގެ މަތިން ޔޫކްރެއިންގެ ހަމަލާ އެ އަވަށަށް އަމާޒުވި ކަމަށާއި ރަޝިއާގެ އެއާ ޑިފެންސުން ގިނަ ހަމަލާތައް ހުއްޓުވި ކަމަށެވެ.
އެއް ހަމަލާ އަަމާޒުވީ މީހުން ދިރިއުޅޭ ގެޔަކަށް ކަމަށާއި އެ ގޭގައި އަލިފާން ރޯވި ކަމަށް އޭނާ ވިދާޅުވި އެވެ. އޭގެ އިތުރުން ވެސް ދެ ގެޔަކަށް ގެއްލުން ލިބުނެވެ.
އެ އަވަށުގައި ވަނީ ކުއްލި ނުރައްކަލުގެ ހާލަތު އިއުލާންކޮށްފަ އެވެ. ރަޝިއާ އާއި ޔޫކްރެއިންއާ ދެމެދު ކުރަމުންދާ ހަނގުރާމައިގައި ބޯޑަރު ކައިރީގެ އަވަށްތަކަށް ވަރަށް ގިނައިން ގެއްލުން ލިބެ އެވެ.
