މޮސްކޯ، ރަޝިއާ (އެޕްރީލް 29) - ޔޫކްރެއިންގެ ހަމަލާތަކާ ގުޅިގެން އެ ގައުމުގެ ބޯޑަރު ކައިރީގައިވާ ރަޝިއާގެ ފަސް އަވަށަކުން ކަރަންޓު ކެނޑިއްޖެ އެވެ.
ރަޝިއާގެ ހުޅަނގު ދެކުނުގައި އޮންނަ ބެލްގޮރޯޑް ސަރަހައްދުގެ ގަވަރުނަރު ވިޔަޗެސްލާވް ގްލަޑްކޯވް ޓެލެގްރާމް މެދުވެރިކޮށް ވިދާޅުވީ ކަރަންޓު ވިޔުގައަށް ގެއްލުން ލިބިފައިވާ ކަމަށެވެ.
ރަޝިއާއިން ޔޫކްރެއިންގައި ކުރަމުންދާ ހަނގުރާމައިގައި ދެ ގައުމުގެ ބޯޑަރު ގުޅޭ ސަރަހައްދުގައި ވަރަށް ގިނައިން ހަމަލާތައް ދެ އެވެ.
ގްލަޑްކޯވް ވިދާޅުވީ ހޮނިހިރު ދުވަހު ޔޫކްރެއިންގެ ހަމަލާ އަމާޒުވީ ނޮވަޔާ ތަވޮލްޒަންކާ އަވަށަށް ކަމަށާއި އޭގެ ސަބަބުން ޖުމްލަ ފަސް އަވަށުން ކަރަންޓު ކެނޑިފައިވާ ކަމަށެވެ.
ހަމަލާތަކުގައި މީހަކު މަރުވިކަމުގެ ރިޕޯޓެއް ނުލިބޭ ކަމަށް އޭނާ ވިދާޅުވި އެވެ. އެހެން ނަމަވެސް ބައެއް ގެތަކަށް ގެއްލުން ލިބުނު ކަމަށް ރިޕޯޓުތައް ބުނެ އެވެ.
އަވަށްތަކަށް ކަރަންޓު އަނބުރާ ދިނުމަށް މަސައްކަތް ކުރަމުންދާ އިރު، މީގެ ކުރިން ރަޝިއާގެ ހަމަލާތަކުގައި ޔޫކްރެއިންގެ ބޮޑެތި ސިޓީތަކުން ކަރަންޓު ކެނޑިފައިވެ އެވެ.
