އުމާން، ޔޫކްރެއިން (އެޕްރީލް 28) - ހުކުރު ދުވަހު ޔޫކްރެއިންގެ އެކި ސިޓީތަކަށް ރަޝިއާއިން ދިން ވައިގެ ހަމަލާތަކުގައި 25 މީހުން މަރުވެއްޖެ އެވެ.
މަރުވި މީހުންގެ ތެރޭގައި ފަސް ކުދިން ވެސް ހިމެނެ އެވެ. ހަމަލާތައް އަމާޒުވި ތަންތަނުގެ ތެރޭގައި ތާރީހީ އުމާން ސިޓީގައި އާއްމުން ދިރިއުޅޭ އިމާރާތެއް ހިމެނެ އެވެ.
އެ ސިޓީއިން އެކަނި 23 މީހުން މަރުވި އިރު، އޭގެ ތެރޭގައި ހަތަރު ކުދިން ހިމެނެ އެވެ. އިމާރާތުގެ ދަށުން މީހުން ސަލާމަތް ކުރަން މަސައްކަތް ކުރީ ކެރޭން ފަދަ ތަކެތީގެ އެހީގަ އެވެ.
އޭގެ އިތުރުން ޑްނީޕްރޯ ސިޓީއަށް ވެސް ހަމަލާތައް އަމާޒުވި އެވެ. މިދިޔަ ޖެނުއަރީ މަހު އެ ސިޓީގައި އާއްމުން ދިރިއުޅޭ އިމާރާތަކަށް ދިން ހަމަލާގައި 40 މީހުން މަރުވި އެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވަނީ ހުކުރު ދުވަހު ދިން ހަމަލާތައް ކުށްވެރިކޮށް، ރަޝިއާއިން ޓެރަރިޒަމްގެ އަމަލު ހިންގާ ކަމަށް ތުހުމަތު ކުރައްވައިފަ އެވެ.
ރަޝިއާއިން ބުނީ ހަމަލާތައް އަމާޒު ކުރީ ޔޫކްރެއިންގެ ސިފައިންގެ ރިޒާވް ޔުނިޓުތަކަށް ކަމަށާއި ހުރިހާ ޓާގެޓަކަށް ވެސް ކާމިޔާބުކަމާ އެކު ހަމަލާދެވުނު ކަމަށެވެ.
ހުކުރު ދުވަހު ހަމަލާ ދިން ސިޓީތަކުގެ ތެރޭގައި ވެރިރަށް ކިޔެވް ވެސް ހިމެނެ އެވެ. އެކަމަކު އެ ސިޓީއިން އެއްވެސް މީހަކު މަރުވި ކަމުގެ ރިޕޯޓެއް ނުލިބެ އެވެ.
