ޝަންހާއީ، ޗައިނާ (އެޕްރީލް 27) - އެމެރިކާގެ ކޮންސަލްޓެންސީ ކުންފުނި ބެއިން އެންޑް ކޮމްޕެނީގެ ޝަންހާއީ އޮފީހުގެ މުވައްޒަފުންނާ ޗައިނާގެ ފުލުހުން ސުވާލުކޮށްފި އެވެ.
ފައިނޭންޝަލް ޓައިމްސް ނޫހުން ބުނީ ކުންފުނީގެ ޝަންހާއީ އޮފީހަށް ފުލުހުން ކުއްލިއަކަށް ދިޔައީ މީގެ ހަފުތާތަކެއް ކުރިން ކަމަށެވެ.
ބެއިން އެންޑް ކޮމްޕެނީއަކީ ދުނިޔޭގެ އެކި ގައުމުތަކުގައި ސްޓްރެޓެޖީ އަދި މެނޭޖްމަންޓް ކޮންޒަލްޓެންސީ ހިދުމަތްތައް ފޯރުކޮށްދޭ ކުންފުންޏެވެ.
އެ ކުންފުނިން ބުނީ ޗައިނާގައި މުވައްޒަފުންނާ ސުވާލުކޮށްފައިވާ ކަމަށެވެ. އެހެން ނަމަވެސް ސުވާލު ކުރީ ކޮން ކަމަކާ ގުޅިގެން ކަމެއް ނުބުނެ އެވެ.
"އަޅުގަނޑުމެން މި ދަނީ ޗައިނާގެ އިދާރާތަކަށް އެއްބާރުލުން ދެމުން،" ކުންފުނިން ނެރުނު ބަޔާނެއްގައި ބުންޏެވެ.
ފައިންނޭންޝަލް ޓައިމްސް ނޫހުން ބުނީ ކުންފުނީގެ މުވައްޒަފުންގެ ފޯނުތަކާއި ކޮމްޕިއުޓަރުތައް ފުލުހުންގެ ބެލުމުގެ ދަށަށް ގެންދިޔަ ކަމަށެވެ. އެކަމަކު އެއްވެސް މީހަކު ހައްޔަރެއް ނުކުރެ އެވެ.
ރިޕޯޓުތައް ބުނާ ގޮތުން މިއީ ޗައިނާގެ ކުންފުނިތަކާ ދެކޮޅަށް އެމެރިކާއިން އަޅަމުންދާ ފިޔަވަޅުތަކާ ހެދި ރައްދު ދިނުމުގެ ގޮތުން ޗައިނާއިން ފެށި ކަމަކަށް ވެދާނެ އެވެ.
އެހެންވެ، ޗައިނާގައި ހަރަކާތްތެރިވާ އެމެރިކާގެ ކުންފުނިތަކުގެ މެދުގައި ކަންބޮޑުވުން އިތުރުވެފައިވާ ކަމަށް ރިޕޯޓުތައް ބުނެ އެވެ.
މިދިޔަ މާޗް މަހު ވެސް ޗައިނާއިން ވަނީ އެމެރިކާގެ މިންޓްޒް ގްރޫޕްގެ ބެއިޖިންއޮފީސް ބަންދުކޮށް ފަސް މުވައްޒަފުން ހައްޔަރުކޮށްފަ އެވެ.
