ބާސެލޯނާ (އޭޕްރީލް 26) - ބާސެލޯނާގެ ސްޓޭޑިއަމް ކަމަށްވާ ނޯ ކޭމްޕް އިތުރަށް ތަރައްގީ ކުރުމުގެ ޕްރޮޖެކްޓަށް ފަންޑިންގެ ގޮތުގައި އެ ކްލަބުން 1.5 ބިލިއަން ޑޮލަރު ހޯދައިފި އެެވެ.
ބާސެލޯނާ އިން ބުނީ މި ފައިސާ ހޯދީ 20 އިންވެސްޓަރެއްގެ އަތުން ކަމަށެވެ. އެ ކްލަބުން ބުނީ އިންވެސްޓަރުންނަށް އަނބުރާ ފައިސާ ދިނުމަށް ފަސް އަހަރާއި 24 އަހަރާ ދެމެދުގެ މުއްދަތެއް ލިބޭނެ ކަމަށެވެ. އަދި މި ފައިސާ އަނބުރާ ދައްކަންޖެހޭނީ ނޯ ކޭމްޕް އިތުރަށް ތަރައްގީ ކުރުމުގެ ޕްރޮޖެކްޓް ނިމުމުން ކަމަށެވެ.
މި ފައިސާ އިން ނޯ ކޭމްޕްގެ އިތުރުން، ބާސެލޯނާގެ އެހެން ފެސިލިޓީޒްތައް ވެސް ތަރައްގީ ކުރުމަށް އިންވެސްޓް ކުރާނެ އެވެ. އެ ގޮތުން، ހޭންޑްބޯލް އާއި ބާސްކެޓްބޯޅައިގެ ފެސިލިޓީޒް އަދި އެ ކްލަބުގެ ރިޒާވް ޓީމާއި އަންހެން ޓީމުގެ މެޗުތައް ކުޅޭ ޔޯހަން ކްރައިފް ސްޓޭޑިއަމް ވެސް ތަރައްޤީ ކުރާނެ އެވެ.
ނޯ ކޭމްޕް ތަރައްޤީކުރުމުގެ ޕްރޮޖެކްޓް ފެށުމަށް ހަމަޖެހިފައިވަނީ ޖޫން މަހުގެ އެއް ވަނަ ދުވަހު އެވެ. ބާސެލޯނާ އިން ބުނީ ނޯ ކޭމްޕް ތަރައްޤީ ކުރުމުގެ ޕްރޮޖެކްޓް 2026ގެ ނިޔަލަށް ނިންމާލެވޭނެ އެވެ. އަދި މަސައްކަތް ކުރިއަށްދާއިރު، ބާސެލޯނާގެ ސީނިއާ ޓީމުގެ މެޗުގެ ކުޅޭނީ މޮންޓްޖުއިކްގެ އޮލިމްޕިކް ސްޓޭޑިއަމްގައި ކަމަށެވެ. ފުލް ކެޕޭސިޓީ އަށް ސަޕޯޓަރުންނަށް ނުވަދެވުނަސް، 2024-2025 ވަނަ އަހަރުގެ ސީޒަންގައި ބާސެލޯނާގެ މެޗުތައް ކުޅޭނީ ނޯ ކޭމްޕްގަ އެވެ.
ބާސާ އިން އެ ކްލަބުގެ ސްޓޭޑިއަމް އިތުރަށް ތަރައްގީ ކުރުމުގެ މަސައްކަތް ފެށިިއިރު، އެ ކްލަބާ ވާދަވެރި ރެއާލް މެޑްރިޑުން ވެސް ވަނީ 2019 ވަނަ އަހަރު ސްޓޭޑިއަމް އިތުރަށް ބޮޑުކޮށް، ތަރައްގީކުރުގެ ޕްރޮޖެކްޓް ފަށައިފަ އެވެ. ކޮވިޑް-19ގެ ސަބަބުން އެކި ސިނާއަތްތަކަށް އައި ހުއްޓުވުމުގެ އަސަރު ރެއާލް ދަނޑުގެ ޕްރޮޖެކްޓަށް ވެސް ކުރި އެވެ.
