މޮސްކޯ، ރަޝިއާ (އެޕްރީލް 24) - ކްރައިމިއާގައި އޮންނަ ސެވާސްޓޮޕޯލް ބަނދަރަށް އަމާޒު ކުރި ޑްރޯން ހަމަލާއެއް ހުއްޓުވާފައިވާ ކަމަށް ރަޝިއާއިން ބުނެފި އެވެ.
ސެވަސްޓޮޕޯލް ސިޓީގެ ގަވަރުނަރު މިކައިލް ރަޒްވޮޖަޔޭވް ވިދާޅުވީ ހަމަލާ ހުއްޓުވީ ރަޝިއާގެ ކަނޑުގެ ސިފައިން ކަމަށެވެ. ހަމަލާ ދޭން އުޅުނީ ދަންވަރުގެ ވަގުތުގަ އެވެ.
އޭނާ ވިދާޅުވީ ސިފައިންގެ މަސައްކަތުން އެއް ޑްރޯން ހުއްޓުވި އިރު، ދެ ވަނަ ޑްރޯން ގޮވީ އަމިއްލައަށް ކަމަށެވެ. އެ ހާދިސާގައި އެއްވެސް ގެއްލުމެއް ނުލިބެ އެވެ.
ރަޝިއާގެ އިންޓާފެކްސް ނިއުސް އެޖެންސީއިން ރިޕޯޓު ކުރި ގޮތުގައި ސެވަސްޓޮޕޯލް ސިޓީގެ ފެރީ ހިދުމަތްތައް މި ވަގުތު ވަނީ މެދުކަނޑާލައިފަ އެވެ.
ހިދުމަތް މެދުކަނޑާލި ސަބަބެއް އިދާރާތަކުން ނުބުނެ އެވެ. އެކަމަކު ރިޕޯޓުތައް ބުނާ ގޮތުން މީގެ ކުރިން ހިދުމަތް މެދުކަނޑާލަނީ ތޫފާނާއި ޑްރޯން ހަމަލާގެ ނުރައްކާ އޮންނަ ހާލަތްތަކުގަ އެވެ.
ސެވަސްޓޮޕޯލް ސިޓީ ހިމެނޭ ގޮތަށް ޔޫކްރެއިންގެ ކްރައިމިއާ ސަރަހައްދު ރަޝިއާގެ ދަށަށް ގެންދިޔައީ 2014 ވަނަ އަހަރު އެވެ. އެކަމަކު ބައިނަލްއަގްވާމީ ގޮތުން ބަލާއިރު ކްރައިމިއާއަކީ އަދިވެސް ޔޫކްރެއިންގެ ބަޔެކެވެ.
ޑްރޯން ހަމަލާގެ ހަބަރުތަކާ ގުޅިގެން ޔޫކްރެއިނުން މިހާތަނަށް ވަކި އެއްޗެއް ނުބުނެ އެވެ. ޔޫކްރެއިންގައި މިދިޔަ އަހަރުގެ ފެބްރުއަރީ މަހު ހަނގުރާމަ ފެށި ފަހުން ކްރައިމިއާއަށް ގިނަ ހަމަލާތަކެއް އަމާޒުވެފައިވެ އެވެ.
