ސެވިލް، ސްޕެއިން (އޭޕްރީލް 20) - މެންޗެސްޓާ ޔުނައިޓެޑުން ޔުއެފާ ޔޫރޮޕާ ލީގުގެ ކުއާޓާ ފައިނަލް ދެ ވަނަ ލެގުގައި ސެވިއްޔާ ދަނޑުގައި މިރޭ ކުޅޭ މެޗުގައި ބޭނުންވަނީ ދިމާވާ ކޮންމެ ހާލަތަކަށް ބެލުމެއް ނެތި "ޖަޒުބާތުގައި ޖެހިގެން ވިޔަސް މޮޅުވާން" ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
މީގެ ހަފްތާއެއް ކުރިން ޔުނައިޓެޑް ދަނޑުގައި ކުޅުނު ފުރަތަމަ ލެގުގައި އެ ޓީމުން މެޗުގެ ކުރީކޮޅުގައި ދެ ގޯލުގެ ލީޑެއް ނަަގައި ހަމަޖެހިލި އެވެ. އެކަމަކު، މެޗުގެ ފަހު ވަގުތުގައި ބައިކޮޅަށް ދެ ގޯލު ވަދެ، ޔުނައިޓެޑް މެޗު ނިންމާލަން ޖެހުނީ 2-2 އިން އެއްވަރުވެގެންނެވެ. އެހެންކަމުން، ސެމީ ފައިނަލަށް ދިއުމަށް ޔުނައިޓެޑަށް މިހާރު އޮތް ހަމައެކަނި ގޮތަކީ މިރޭ ސެވިއްޔާ ދަނޑުގައި މޮޅުވުމެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޓެން ހާގް ބުނީ ސީޒަނުގެ މުހިންމު ހިސާބެއްގައި ކުޅޭ މި ފަދަ މެޗުތަކުގައި މެޗުގެ އޮއެވަރު ބަދަލުވާއިރު، ޖަޒުބާތުގައި ޖެހިގެން ގިނަ ކަންކަން ކުޅުންތެރިންނަށް ކުރެވޭ ކަމަށެވެ. އަދި ބޭނުންވަނީ އެ ފަދަ ހާލަތްތަކުގެ ތެރެއިން ވެސް ރަނގަޅު ނިންމުންތައް ޔުނައިޓެޑުން ނިންމައި، މެޗުން މޮޅުވާން ކަމަށް ޓެން ހާގް ވަނީ ބުނެފަ އެވެ.
"އިމޯޝަންސް (ޖަޒުބާތު) މި ފަދަ މެޗުތަކުގައި މުހިންމު ރޯލެއް ކުޅޭނެ. ކަމަަކަށް ބޭނުންވެގެން އެ ކުރާ މަސައްކަތެއްގެ ތެރެއިން ހިތްވަރު އެލުވާނުލައި އެ ފޯކަސް ބަހައްޓައިގެން ތިބެންވާނީ. އަހަރެން އެދެނީ ކޮންމެ ހާލަތެއްގައި ވެސް ޔުނައިޓެޑުން މޮޅުވާން،" މި ސީޒަނުގައި ޔުނައިޓެޑަށް އިނގިރޭސި ލީގު ކަޕްގެ ޗެމްޕިއަންކަން ހޯދައިދިން ޓެން ހާގް ބުންޏެވެ.
ޔުނައިޓެޑުން މި މެޗަށް ކުރިމަތިލާއިރު، އެ ޓީމަށް ކުރިމަތިވެފައި އޮތީ އަނިޔާގެ ސަަބަބުން އުނދަގޫ ހާލަތެެކެވެ. އެކަމަކު، ހިތްހަމަޖެހުމަކީ މި މެޗާ ދިމާކޮށް ޔުނައިޓެޑްގެ އެންމެ ފޯމުގައި ހުރި އެޓޭކަރު، މާކަސް ރަޝްފޯޑް ޓީމުގެ ފަރިތަކުރުންތަކާ ގުޅިފައިވުމެވެ. އަނިޔާގެ ސަބަބުން ފުރަތަމަ ލެގުގައި ރަޝްފޯޑަށް ނުކުޅެވުނެވެ.
އަނެއްކޮޅުން މިދިޔަ ސީޒަނުގައި ޔުނައިޓެޑްގެ ލޯން އެއްބަސްވުމެއްގެ ދަށުން ސެވިއްޔާ އަށް ކުޅުނު ފޯވާޑް އެންތަނީ މާޝިއަލްގެ ބޭނުން މި މެޗުގައި ހިފާނެ ކަމަށް ޓެން ހާގް ވަނީ ބުނެފަ އެެވެ.
ސެވިއްޔާގެ ސަންޗޭޒް ޕިޒްޗުއާން ސްޓޭޑިއަމްގައި މިރޭ ޔުނައިޓެޑާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
