ޔޫކްރެއިންގެ ވެރިރަށް ކިޔެވްގެ މަތިން ފެނުނު ގޮތް ނޭނގޭ އަލިގުޅައަކީ ނާސާގެ ސެޓެލައިޓެއް ނޫން ކަމަށް ބުނެފި އެވެ.
އެއީ ނާސާގެ ސެޓެލައިޓެއް ދުނިޔެއަށް ވެއްޓުމުން ފެނުނު އަލިގުޅައެއް ކަމަށް ޔޫކްރެއިންގެ އޮފިޝަލުން ލަފާކުރި ނަމަވެސް، ނާސާއިން ބުނީ އެއީ އެ އިދާރާގެ ސެޓެލައިޓެއް ނޫން ކަމަށެވެ.
އެހެންވެ، އެއީ ގިނިހިލައެއް ވެއްޓުނު މަންޒަރު ކަމަށް ޔޫކްރެއިންގެ ވައިގެ ސިފައިން ލަފާކުރެ އެވެ. އެއީ ރަޝިއާގެ ހަމަލާއެއްގެ ސަބަބުން ފެނުނު އަލިގުޅައެއް ނޫން ކަމަށް ސިފައިން ޔަގީންކަމާ އެކު ބުނެ އެވެ.
އެ އަލިގުޅަ ފެނުނީ ވެރިރަށް ކިޔެވްގެ މަތިން ބުދަ ދުވަހުގެ ރޭ 10:00 ހާއިރު އެވެ. އެއާ އެކު އެއާ ރެއިޑް އެލާޓް އެކްޓިވޭޓްވި ނަމަވެސް، އެއާ ޑިފެންސް އޮޕަރޭޓްކޮށްފައެއް ނުވެ އެވެ.
މި ހަފުތާގެ ކުރީކޮޅު ނާސާއިން ބުނީ 300 ކިލޯގެ ސެޓެލައިޓެއް ބުދަ ދުވަހު ދުނިޔެއަށް ވެއްޓޭނެ ކަމަށެވެ. އެކަމަކު އަލިގުޅަ ފެނުނު ވަގުތު އެ ސެޓެލައިޓް ދައުރުވަމުން ދިޔައީ އޯބިޓުގައި ކަމަށް ނާސާއިން ބުންޏެވެ.
ގޮތް ނޭނގޭ އަލިގުޅަ ފެނުމާ އެކު ޔޫކްރެއިންގެ ސޯޝަލް މީޑިއާގައި ދަނީ އެކި ގޮތްގޮތަށް ވާހަކަ ފެތުރެމުންނެވެ. އެގޮތުން އެންމެ މަގްބޫލު ތިއަރީއަކީ އެއީ އޭލިއަންގެ ސަބަބުން ފެނުނު އެއްޗެއް ކަމެވެ.
