ރޯދަ މަހާ ދިމާކޮށް އާއްމުންނަށް އެހީ ބެހުމަށް ބޭއްވި އިވެންޓެއްގެ ތެރެއިން ޔަމަނުގެ ވެރިރަށް ސަނާގެ ސްކޫލެއްގައި ފިތި ބާރުވެގެން 78 މީހުން މަރުވެއްޖެ އެވެ.
ސަނާގެ ބާބް އަލް ޔަމަން ސަރަހައްދުގެ ސްކޫލެއްގައި ހިނގި ހާދިސާގެ ވީޑިއޯތައް ވަނީ އާއްމުވެފަ އެވެ. ރޮއިޓާޒް ނޫހުން ބުނީ އެ ތަނުގައި އެހީގެ ގޮތުގައި ބެހީ ނުވަ ޑޮލަރުގެ ތަކެތި ކަމަށެވެ.
ޔަމަނުގެ އިންތިހާބީ ސަރުކާރާ ދެކޮޅަށް 2015 ވަނަ އަހަރު ހަނގުރާމަ ފެށި ފަހުން ސަނާގެ ކޮންޓްރޯލް އޮތީ އިރާނުގެ އެހީއާ އެކު އުޅޭ ހޫތީންނަށެވެ.
އިންޓީރިއާ މިނިސްޓްރީން ބުނީ އެ އިވެންޓު ރޭވި މީހުން ހައްޔަރުކޮށްފައިވާ ކަމަށާއި އެކަން ހިނގައި ދިޔަ ގޮތް ބެލުމަށް ތަހުގީގު ކުރިއަށްދާ ކަމަށެވެ.
އެ މިނިސްޓްރީގެ ތަރުޖަމާނަކު ބުނީ މީހުން ފިތިބާރުވީ ރަސްމީ އޮފިޝަލުންނާ މަޝްވަރާ ނުކުރުމާއި ރަނގަޅު އިންތިޒާމްތައް ހަމަޖައްސާފައި ނެތުމުން ކަމަށެވެ.
ސިއްހީ އޮފިޝަލުން ބުނީ އެ ހާދިސާގައި ގިނަ ބަޔަކަށް އަނިޔާވި ކަމަށާއި އޭގެ ތެރެއިން 13 މީހެއްގެ ހާލު ސީރިއަސް ކަމަށެވެ.
ބައެއް ރިޕޯޓުތައް ބުނާ ގޮތުން އެހީ ހޯދަން އެއްވި އެތައް ސަތޭކަ މީހުން ކޮންޓްރޯލް ކުރުމުގެ ގޮތުން ހޫތީން ވައިގެ ތެރެއަށް ބަޑި ޖެހި އެވެ. އޭގެން ވަޒަނެއް ގޮސް، ކަރަންޓު ވަޔަރެއްގައި ޖެހި ގޮވުމެއް މެދުވެރިވި އެވެ.
އެ ގޮވުމާ އެކު މީހުންގެ ތެރޭގައި ބިރުވެރިކަން އުފެދި، ސަލާމާތް ވާން ކުރި މަސައްކަތުގެ ތެރެއިން ފިތިބާރުވީ ކަމަށް ބައެއް ފަރާތްތަކުން އޭޕީ ނޫހަށް ބުންޏެވެ.
