ޔަމަނުން އިޒްރޭލުގެ ވެރިރަށް ތެލް އަވިވްއަށް ފޮނުވާލި މިސައިލް ހަމަލާއެއްގައި 14 މީހުން ޒަހަމްވެއްޖެ އެވެ.
ރިޕޯޓްތައް ބުނާ ގޮތުން ތެލް އަވިވްގެ ޕާކަކަށް އަމާޒުވި އެ މިސައިލް ހަމަލާގައި ޒަހަމްވި މީހުންނަށް ހޮސްޕިޓަލުގައި ފަރުވާ ދެމުން އަންނައިރު، އެ މީހުންނަށް ސީރިއަސް ޒަހަމްތަކެއް ލިބިފައެއް ނުވެ އެވެ.
އިޒްރޭލުގެ ޑިފެންސް މިނިސްޓްރީން ބުނީ ޔަމަނުން ފޮނުވާލި ބައެއް މިސައިލްތައް އެއާ ޑިފެންސް ސިސްޓަމުން ހުއްޓުވި ނަމަވެސް، ބައެއް މިސައިލްތައް ނުހުއްޓުވި އަމާޒަށް ވާސިލުވި ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ޔަމަނުން ފޮނުވާލި މިސައިލް ހަމަލާ އަމާޒުވެ، ގޮވުންތަކެއް ގޮވަ އެވެ.
އިޒްރޭލުގެ ސަލާމަތީ ބާރުތަކާއި ފުލުހުން އަންނަނީ ހަމަލާދިން ސަރަހައްދު ބަންދުކޮށް، އެ ސަރަހައްދުގައި ހަަރަކާތްތެރިވަމުންނެވެ.
މިދިޔަ އަހަރުގެ އޮކްޓޯބަރު 7، އިން ފެށިގެން އިޒްރޭލުން ފަލަސްތީނުގެ ގާޒާއަށް މެދުނުކެނޑި ހިންގަމުންދާ ނަސްލު ހޭދައިގައި މިދިޔަ 24 ގަޑިއިރު ދިން ހަމަލާތަކުގައި ވެސް 77 މީހުން ވަނީ މަރާލާފަ އެވެ.
މިހާތަނަށް އިޒްރޭލުގެ އަނިޔާވެރި ހަމަލާތަކުގައި ގާޒާއިން 45،20 މީހުން މަރުވެފައިވާއިރު، 107،512 މީހުން ޒަހަމްވި އެވެ.
މެދުއިރުމަތީގައި ހިނގަމުންދާ ހަމަނުޖެހުމާއި ހަނގުރާމަތައް ހުއްޓާލުމަށް ގައުމުތަކުން މަސައްކަތް ކުރަމުންދިޔަ ނަމަވެސް، އިޒްރޭލުގެ އަމަލުތައް ހުއްޓުވަން ގައުމުތައް ވަނީ ނުކުޅެދިފަ އެވެ.
