ޔޫކްރެއިންގެ ގޮވާމާއި އެހެން ކާބޯތަކެތި އެތެރެ ކުރުން ވަގުތީ ގޮތުން މަނާކުރަން ބަލްގޭރިއާއިން ވެސް ނިންމައިފި އެވެ.
މީގެ ކުރިން ޕޮލޭންޑް، ހަންގޭރީ އަދި ސްލޮވޭކިއާއިން ވެސް ވަނީ އެ ފިޔަވަޅު އަަޅައިފަ އެވެ. އެ ގައުމުތަކުގެ ދަނޑުވެރިން ވަނީ ޔޫކްރެއިނުން އެތެރެ ކުރާ ތަކެތީގެ ސަބަބުން ގެއްލުން ވާތީ މުޒާހަރާކޮށްފަ އެވެ.
"ތިން ގައުމަކުން އެޅި ފިޔަވަޅު ނަމޫނާއެއްގެ ގޮތުގައި ބަލައި ސަރުކާރުން ނިންމީ ޔޫކްރެއިންގައި އުފައްދާ ބައެއް ތަކެތި އެތެރެ ކުރުން ވަގުތީ ގޮތުން މަނާކުރަން،" ބަލްގޭރިއާގެ ދަނޑުވެރިކަމާ ބެހޭ މިނިސްޓަރު ޔާވޯ ގެޗޭވް ވިދާޅުވި އެވެ.
ބަލްގޭރިއާއިން ބުނީ އެ ފިޔަވަޅު އެޅީ އެހެން ގައުމުތަކުގެ ނިންމުމާ ހެދި ބަލްގޭރިއާއަށް އޮތް ޕްރެޝަރު ބޮޑުވެ މަޖުބޫރުވެގެން ކަމަށެވެ. އެކަމާ ގުޅޭ ގޮތުން ޔޫރަޕިއަން ޔޫނިއަން (އީޔޫ) އިން އެއްބަސްވާ ގޮތެއް ވަރަށް އަވަހަށް އިއުލާން ކުރާނެ ކަމަށް އުއްމީދު ކުރާ ކަމަށް އެ ގައުމުން ބުންޏެވެ.
މި ހަފުތާގައި އީޔޫއިން ވަނީ ގައުމުތަކުން ވަކިވަކި ސިޔާސަތު ހެދުމަކީ އޮންނަ އުސޫލެއް ނޫން ކަމަށް ބުނެ، ޔޫކްރެއިންގެ ތަކެތި އެތެރެ ކުރުން ވަގުތީ ގޮތުން މަނާކުރި އީޔޫގެ މެމްބަރު ގައުމުތަކާ މެދު ނުރުހުން ފާޅުކޮށްފަ އެވެ.
