އާޓިފިޝަލް އިންޓެލިޖެންސް (އޭއައި)ގެ އެހީގައި ޑްރޭކް އާއި ދަ ވީކެންޑްގެ އަޑު ނަކަލުކޮށް އުފެއްދި ލަވައެއް ސޯޝަލް މީޑިއާގައި ވައިރަލްވެއްޖެ އެވެ.
"ހާޓް އޮން މައި ސްލީވް" ލަވައިގެ ލިރިކްސް ބިނާވެފައި އޮތީ ޕޮޕް ލަވަކިޔުންތެރިޔާ އަދި އެކްޓްރެސް ސެލީނާ ގޮމޭޒްއާ ބެހޭ ގޮތުންނެވެ. ސެލީނާއަކީ ދަ ވީކެންޑްގެ ކުރީގެ ލޯބިވެރިޔެކެވެ.
އޭއައިގެ އެހީގައި އެ ލަަވަ އުފެއްދީ "@ގޯސްޓްރައިޓާ" ކިޔާ އެކައުންޓަކުންނެވެ. އެ އެކައުންޓުން ބުނީ ލަވަ އުފެއްދީ ޑްރޭކް އާއި ދަ ވީކެންޑްގެ އަޑުތަކަށް ތަމްރީންކޮށްފައިވާ ސޮފްޓްވެއާއަކުން ކަމަށެވެ.
"މިއީ އަދި ފެށުން،" އެ ލަވައިގެ ޔޫޓިއުބް ވީޑިއޯއާ އެކު ކުރި ކޮމެންޓެއްގައި ގޯސްޓްރައިޓާ ލިޔުނެވެ.
"އަހަރުމެން ހަގީގަތުގައި ވެސް މި އުޅެނީ ވަރަށް ތަފާތު ޒަމާނެއްގައި. ހަގީގަތާއި ފޭކު ވަކިކުރަން ވެސް މިހާރު ނޭނގޭ،" މީހަކު ކުރި ކޮމެންޓެއްގައި ބުންޏެވެ.
ހުކުރު ދުވަހު ލަވަ ޕޯސްޓުކުރި ފަހުން ޓިކްޓޮކްގައި މިހާތަނަށް 8.5 މިލިއަން ވިޔުޒް ލިބިފައިވެ އެވެ. ސްޕޮޓިފައިގައި އެ ލަވަ 254،000 ފަހަރު ޖަހާފައިވެ އެވެ.
އެ ލަވައާ ގުޅޭ ގޮތުން ޑްރޭކް އާއި ދަ ވީކެންޑް ވެސް އަދި ވަކި އެއްޗެއް ބުނެފައެއް ނުވެ އެވެ. އެކަމަކު ޑްރޭކް މީގެ ކުރިން ވަނީ އޭނާގެ އަޑު ނަކަލުކޮށްގެން މީހުން އުޅޭތީ ނުރުހުން ފާޅުކޮށްފަ އެވެ.
