ރަޝިއާގެ އިދިކޮޅު އެކްޓިވިސްޓު ލެޑިމިއަ ކާރާ-މުރްޒާ 25 އަހަރަށް ޖަލަށް ހުކުމް ކޮށްފި އެވެ.
އޭނާގެ މައްޗަށް ސާބިތުވީ ހިޔާނާތްތެރިވުމާއި، ރަޝިއާ ސިފައިންނާ ގުޅޭ ދޮގު މައުލޫމާތު ފެތުރުމާއި، ނުރަނގަޅު ގްރޫޕަކާ އެކު މަސައްކަތް ކުރި ކަމަށެވެ.
ރަޝިއާ އާއި އިނގިރޭސި ޕާސްޕޯޓް އޮންނަ ކާރާ-މުރްޒާއަކީ ކުރިން ނޫސްވެރިއެކެވެ. ފަހުން ސިޔާސީ ދާއިރާގައި އުޅެން ފެށީ ސަރުކާރާ ދެކޮޅު ފަރާތެއްގެ ގޮތުގަ އެވެ.
އޭނާ ވަނީ ހުރިހާ ދައުވާތަކެއް ދޮގުކޮށްފަ އެވެ. އޭނާއަށް ކުރި 25 އަހަރުގެ ހުކުމަކީ މިހާތަނަށް ރަޝިއާގެ އިދިކޮޅު ފަރާތަކަށް ކުރި އެންމެ ދިގު ހުކުމެވެ.
ރަޝިއާއިން އިންސާނީ ހައްގުތަކާ ދެކޮޅަށް ހިންގާ ކަންކަމާއި ކޮރަޕްޝަންގެ އަމަލުތަކާ ގުޅިގެން އޮފިޝަލުންނާ މެދު ދަތިކުރުމުގެ ފިޔަވަޅު އަޅަން ހުޅަނގުގެ ގައުމުތަކަށް އެންމެ ބޮޑަށް ބާރު އެޅީ އޭނާ އެވެ.
ކާރާ-މުރްޒާ ހައްޔަރު ކުރީ މީގެ އަހަރެއް ކުރިން ފުލުހުންނަށް ނުކިޔަމަންތެރިވިކަމުގެ ތުހުމަތުގައި މޮސްކޯއިންނެވެ. އެހެން ދައުވާތައް އުފުލީ ހައްޔަރުގައި ބަހައްޓައިގެންނެވެ.
އޭނާގެ މައްޗަށް ހުކުމްކުރުން އިނގިރޭސިވިލާތުން ވަނީ ކުށްވެރިކޮށްފަ އެވެ. އަދި އިނގިރޭސިވިލާތުގައި ހުންނަ ރަޝިއާގެ ސަފީރު ފޮރިން މިނިސްޓްރީއަށް ހާޒިރުކުރި އެވެ.
