މި ރޯދަ މަހު މާލޭ ވިޔަފާރި ބަނދަރަށް އަންނަ ބޯޓުތަކުން މުދާ ހުސްކުރުމުގެ އެއްވެސް މައްސަލައެއް ދިމާވެފައިނުވާ ކަމަށާއި، 16 ގަޑިއިރުން ބޯޓެއް ހުސްކުރަމުންދާ ކަމަށް އެ ބަނދަރު އޮޕަރޭޓްކުރާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
ރޯދަ މަހު މާލޭ ވިޔަފާރި ބަނދަރުގެ މަސައްކަތް ކުރިއަށްދާ ގޮތާ ބެހޭގޮތުން މީޑިއާތަކަށް މައުލޫމާތު ދެއްވަމުން އެމްޕީއެލްގެ އެސިސްޓަންޓު ޖެނެރަލް މެނޭޖަރު އަދި ކާގޯ ކްލިއަރެންސްގެ ހެޑު ތޮލްއަތު ސައީދު ވިދާޅުވީ، ރޯދަ މަހަކީ އެންމެންނަށްވެސް އެނގޭނެ ފަދައިން މުދާ އެތެރެކުރާ މިންވަރު އިތުރުވާ މަހެއް ކަމުން އެ ކުންފުނިން މި އަހަރު ވަރަށް ބޮޑު ތައްޔާރީތަކެއްވީ ކަމަށެވެ.
މާލޭ ވިޔަފާރި ބަނދަރުގައި މުދާ ބޭލުމުގެ މަސައްކަތް ކުރިއަށްދަނީ - ފޮޓޯ: މުހައްމަދު ޝާބިން / އަދަދު
ހާއްސަކޮށް ހަލާކުވާ ޒާތުގެ މުދާ އަވަހަށް ހުސްކޮށް ކްލިއާ ކުރެވޭނެ އިންތިޒާމުތައް ގާއިމުކުރުމަށް ގިނަ މަސައްކަތްތަކެއް ކުރެވުނުކަންވެސް އޭނާ ފާހަގަކުރެއްވި އެވެ. އެގޮތުން, ވަގުތީ ޝެޑުތަކެއް ހެދުމުގެ ސަބަބުން ބޯޓުތަކުން އަވަހަށް މުދާ ބާލާ އެ ތަކެތި ޖެހޭނެ ތަނެއް ލިބިގެންދިޔަ ކަމަށް ތޮލްއަތު ވިދާޅުވި އެވެ.
"ކުރީގަ ރާއްޖެއަށް އަންނަ ބޯޓުތައް ހުސްކުރުމަށްޓަކާ ދެދުވަސް ތިން ދުވަސް ހޭދަކުރާ ހޭދަކުރުން އަޅުގަނޑުމެންނަށް ގާތްގަނޑަކަށް 16 ގަޑިއިރަށް ބަދަލުކުރެވިގެންދިޔަ މިކަހަލަ އިންތިޒާމުތައް ހަމަޖެއްސުމާ ގުޅިގެން" ތޮލްއަތު ވިދާޅުވި އެވެ.
ރޯދަމަހު އެންމެ ގިނައިން އެތެރެކުރާ އެއް ބާވަތް ކަމަށްވާ ކަރާ ބަނދަރަށް ހުސްކުރަނީ - ފޮޓޯ: މުހައްމަދު ޝާބިން / އަދަދު
އޭގެއިތުރުން، އާންމު ގޮތެއްގައި މި އަހަރުގެ ރޯދަ މަހުވެސް އެންމެ ގިނައިން އެތެރެކޮށްފައިވަނީ ބިސް، ކަރާ އަދި ދޮންކެޔޮ ފަދަ ހަލާކުވާ ޒާތުގެ މުދާ ކަމަށާއި އެ ތަކެތި ކްލިއާ ކުރުން ލަސްވެގެން އެހެން އަހަރުތަކުގާ ބާޒާރުގެ އަގުތަކަށް އަންނަ ނޭދެވޭ ބަދަލުތައް މި އަހަރު ނާންނަކަމަށާއި މުދާ ކްލިއާ ނުވެެގެން ޝަކުވާ ހުށަހެޅިފާ ނުވާ ކަމަށްވެސް ތޮލްއަތު ވިދާޅުވި އެވެ.
އަދި، ޓްރާންސްޕޯޓް މިނިސްޓްރީއިން ރޯދަ މަހު ހަވީރު 4:00 އިން ފެށިގެން މުދާ އުފުލުން މަނާކޮށްފައި އޮތުމުން އެކަމަށް ތަބާވުމުގެ ގޮތުން ކޮންމެ ދުވަހަކުވެސް އެ ވަގުތުގެ ކުރިން މުދާ ބަރުކުރާ ވެހިކަލްތައް ބަނދަރުން ނެރުމުގެ މަސައްކަތް ކުރާ ކަމަށްވެސް އޭނާ ވިދާޅުވި އެވެ.
