ރައްޔިތުންގެ މަޖިލީހުގެ ކ.ގުރައިދޫ ދާއިރާގެ ގޮނޑިއަށް މެމްބަރަކު ހޮވަން މިހާރު ކުރިއަށް ގެންދާ ބައި އިލެކްޝަންގައި ނިސްބަތުން ގިނަ ބަޔަކު މިހައިތަނަށް ވޯޓުލައިފި އެވެ.
އިލެކްޝަންސް ކޮމިޝަން (އީސީ) އިން އާއްމުކުރި ތަފާސް ހިސާބުތަކުން ދައްކާ ގޮތުން މި އިންތިހާބުގައި ވޯޓުލުމުގެ ހައްގު ލިބިފައިވާ 3،423 މީހުންގެ ތެރެއިން ގާތްގަނޑަކަށް 800 މީހުން ވަނީ މެންދުރު 12:00 ގެ ކުރިން ވޯޓުލައިފަ އެވެ.
އީސީގެ ތަފާސް ހިސާބުތަކުގައިވާ ގޮތުން 424 ފިރިހެނުންނާއި 373 އަންހެނުންނާ އެކު ޖުމްލަ 797 މީހަކު ވަނީ މެންދުރު ވުމުގެ ކުރިން ވޯޓުލައިފަ އެވެ.
ރާއްޖޭގެ އެންމެ ބޮޑު ދެ ޕާޓީކަމަށް ވާ އެމްޑީޕީއާއި ޕީޕީއެމުން ވާދަކުރާ އިންތިހާބުގައި ވޯޓުލުން ކުރިއަށް ދާ ރޭޓް އެމްޑީޕީގެ ބައެއް ބޭފުޅުން ދެކެވަޑައިގަންނަވާ ގޮތުގައި ރަނގަޅެވެ. ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވި ގޮތުގައި އޭނާ މޮނިޓާ ކުރައްވަމުން ގެންދަވާ މާފުށީގައި ވޯޓުލުމުގެ ފޯރި، ރޯދަމަހަކާ އަޅަައި ބަލާއިރު ރަނގަޅެވެ.
"ވޯޓުލުމުގެ ފޯރި ކުޑައެއް ނޫން. އެކަމަކު މިއީ ރޯދަމަހަށް ވެފައި، އަދި އަމުދުން ފަހު 10 ވީމާ މީހުން އެހާ އަވަހަށް ނުނިކުންނަނީ،" އޭނާ ވިދާޅުވި އެވެ.
ޕީޕީއެމްގެ ފަރާތުން ގުޅީގައި ހުންނެވި ނައިފަރު ދާއިރާގެ މެމްބަރު އަހުމަދު ޝިޔާމް އެކަމަކު ސިފަކުރެއްވީ ވޯޓުުލުމުގެ ފޯރިއެއް އެހާ ބޮޑަށް ނެތް ކަމަށެވެ. އެއީ މުޅި ނިޒާމަށް ރައްޔިތުންގެ އިތުބާރު ގެއްލިފައި ވާތީ ކަމަށް އޭނާ ވިދާޅުވި އެވެ.
"އަޅުގަނޑު މިހިރީ ގުޅީގައި މިރަށުގައި ވޯޓުލާން ނުކުތް މީހުން މާ މަދެއް ނޫން އެހެން ނަމަވެސް ނިސްބަތުން ފޯރި ކުޑަ. އެއީ މުޅި ނިޒާމާ މެދު ރައްޔިތުންގެ އިތުބާރު ގެއްލި، ހިތްހަމަ ނުޖެހިފައި ތިބީމާ،" ޝިޔާމް ވިދާޅުވި އެވެ.
މި ބައިއިލެކްޝަންގައި ވާދަކުރަނީ ޕީޕީއެމް، އެމްޑީޕީ އަދި އެމްއެންޕީ އެވެ. އިންތިހާބުގެ ވޯޓުލުން ކުރިއަށްދާނީ ހަވީރު 4:00 އާ ހަމައަށެވެ.
