ދާދި މިދާކަށް ދުވަހު ހުޅުމާލޭ މިސްކިތަކަށް ނަމާދަށް ދިޔައިމެވެ. އޭރު ޖަމާއަތް ނިމިއްޖެ އެވެ. މިސްކިތު ހަރިންމަ ތެރެއަށް ވަންއިރު މެދު އުމުރަށްވުރެ މަތީ މީހަކު ފައިވާން ހަރާއި ހިސާބު ތަނބެއްގައި ލެނިގިލައިގެން ހުއްޓެވެ. އަހަރެން ވަދެގެން އައިއިރު އޭނާ ބަލަން ހުރި ގޮތުންނާއި މޫނުމަތީގައި ހުރި ހިތި ހިނިތުންވުމުން ގިނަ ވާހަކަތަކެއް އޭރުވެސް ކަންފަތަށް އިވޭ ކަހަލަ އެވެ.
ފައިވާން ބަހައްޓާފައި ހިނިތުންވެލަމުން ސަލާމް ގޮވާލާ ސަލާމްކޮށްލީމެވެ. ބޭބެ ސަލާމްކޮށްލަމުން އަހަރެން ގާތު ތީ ކޮންރަށެއްގެ މީހެއްތޯ ސުވާލު ކޮށްލި އެވެ. ރަށް ބުނުމާއެކު "މިހާރު ހެނދުނު ލައްޓި ގަނޭހޭ" ރިހުން އެކުލެވިގެން ރާގަކަށް އަހައިލި އެވެ. މިހާރު ހެނދުނު ލައްޓި ގަނޭހޭ އަހާ އެކޮށްލި ސުވާލަކީ އަހަރެންނަށް ވަރަށް ބޮޑު ސުވާލަކަށް ވި އެވެ. އަހަރެންނަކީ ކަނޑު މައްޗަށް އަރާމީހެއްތޯ ނާރާ މީހެއްތޯ ވެސް އަހާނުލައި ހެނދުނު ލައްޓި ގަނޭހޭ އަހާލި އަހާލުމުން އަހަރެންނަށް އިހްސާސް ކުރެވުނީ, ނުދަންނަ މީހަކު ރޭގަނޑު ކެޔޮޅުކަމު ގޮސް ނަނުބައި އޮޅުމުން, ނަނު ބައި އޮޅުންފިލުވަން މަސައްކަތް ކުރާފަދަ ފަދަ ގޮތުގަ އެވެ.
ހުއްޓުން އެރި ނަމަވެސް ވާހަކަ ފެށީމެވެ. ހެދުނު ލައްޓި މިދުވަސްކޮޅު ގަނެ އެވެ. އެކަމަކު ވަރަށް ދެރަ އެވެ. ކަނޑުފުރާ އޮތީ ހުސް ތެލާއްސެވެ. އެކަމާހުރެ ވަދުގައި ވަރަށް ނުގަނެ އެވެ. ގަންނަ އެއްޗެއްވެސް ގަންނަނީ ހާލުވަދު ބަނދެގެން ހިމަ މިޔަވާލީގައި ކުދި ބުޅިލައިގެންނެވެ. ލައްޓިތައް ތިބެނީ އެ އެއްޗެހި ކައި ބަނޑު ފުރައިގެންނެވެ. ދެން އެގޮތް މި ގޮތަށް އުޅެގެން ވަރަށް މަދުން އެއްޗެއް ބޭވެ އެވެ. ބޮޑުތިލަ ބޭރުން ވެސް ކުޑަޗީ ކަނޑުން ވެސް މާނިޔާ މަސް ނެގިޔަސް، އެ ސޮރުމެން ވެސް އޮއި ހަދައިގެން އުޅެނީ ތެލާހި ކާށެވެ.
މި ބޭބެއަކީ އަހަރެން ރަށާ ވަރަށް ކައިރި ރަށެއްގެ މީހެކެވެ. އެ ރަށުން ފުރައިގެން ލައްޓިއަށް ދުއްވާ މީހުން ދެކުނަށް އަންނައިރު އަހަރުމެންގެ ރަށުން (ށ. ކަނޑިތީމު) އުތުރަށް ދަތުރު ކުރާ މީހުންނާ ބައްދަލުވާނެ އެވެ. ވީމާ އެ މީހުން އާންމުކޮށް ގޮސްއުޅޭ ތަނެއް ވީމާ އަހަރުމެން ރަށު މީހުން ލައްޓި ބާނާނަމަ އެ މީހުންނަށް ވެސް ބޭވޭނެކަން އެނގޭތީ މަސްވެރިކަމުގެ ވާހަކަ އެހީ އެވެ. މަސްވެރިކަމުގައި ކަނޑުމަތީގައި އުޅުނު މީހެއްގެ ހިތުން މަސްވެރިކަމުގެ އުފާވެރިކަން ކެނޑިގެން ނުދާނެ އެވެ. ދިޔަޔަސް ދާނީ ލައްކަ ދުވަހުންނެވެ. ވީމާ ހުޅުމާލޭގައި އުޅެން ޖެހިފައިވިޔަސް ކަނޑުމަތީގެ ހަނދާންތަކުން ޒައްރެއްގެ މިންވަރުވެސް އުނިނުވާކަން އެނގެއެވެ.
ފަތިހު ލައްޓިއަށް ފުރާ މީހުންނަކީ މުދިންބެއަށްވުރެ ކުރިން ހޭލާ ބައެކެވެ. ޖައާމަތުގައި ނަމާދު ކޮށްލައިގެން އަވަސް އަވަހަށް ގެއަށް އައިސް ކޮފީއެއް, ސައި ތައްޓެއް ބޮވޭލެއްވެސް ހުންނާނީ ލަސްވެފަ އެވެ. ރަނގަޅު ކެޔޮޅަކު ނަމަ އެންމެންނަށް ވުރެ ކުރިން ފަޅުން ނުކުންނަން ބޭނުންވާނެ އެވެ. އެންމެ ލަސްވެގެން އިރު ފެނުން ތޮޅިލާއިރު ހުންނަން ޖެހޭނީ އޮއި މައްޗަށް އެރިފަ އެވެ.
ފަތިހު ޖެހެމުންދާ ދުންފިނި ފިނިވައިރޯޅީގެ ފިރުމުމާއި އިރަށް ދޮންކުރާ ކުލަކުލައިގެ ވިލާތަކުގެ ތެރެއިން ފުރޭނިގެން އަންނަ ދޯދިތައް މޫނުގައި ބޮސްދޭދިނުމާއި, ކަނޑުގެ ބާނިތަކާއި ދޯދިތަކުގެ ނެށުމަށް ވާވާ ގޮވާލާ ފުންމާލާ ލައްޓި، ރާގޮންޑިތަކުން ހަށިގަނޑަށް ތާޒާކަން ގެނުވަ އެވެ. ހެނދުނުގެ ބޭސް އަވިން ހަށިގަނޑުގެ ގަނޑު ފިނިކަން ފިލުވަމުން ދާއިރު ހަށިގަނޑުގައި ހުރި އެތައް ރިހުމެއް އާތްވަށް އަރައިގެން ދާތަން ފެންނަ ފަދަ އެވެ. ހިތުގައިވާ ނުތަނަވަސް ކަމެއް ލައްޓި ރާގޮނިޑިއެއް ނަނުގައި ގަތަސް ނުގަތަސް ފިލައިދެ އެވެ. މިއީ ޒަމާނީ ޑަކްޓަރީ ބޭހުން ވެސް ލިއްބައިނުދޭ ދިރުމެވެ.
ކުރާނެކަމެއް ނެތެވެ. ބޭބޭ މިތަނަށް އައިސް މިތެޅެނީ އަންނަ ހިތަކުން ނޫނެވެ. ބޭބެގެ އަށް ދަރިން ދުނިޔޭގައި ތިބޭނެ އެވެ. ހުރިހާ ދަރިންވީ މިތަނުގައި ވަޒަންވެރިވެފަ އެވެ. ބޭބެ މިތަނަށް ނާންނަށް ގަދަފައި ވިއްދައިގެން ހުއްޓާ ނައިސްނުވީ ކުއްލިއަކަށް އަންހެނުން ނިޔާވީމަ އެވެ. އަމިއްލައަށް އަންނައުނު ދޮވެ ގޭދޮށް ކުނިކަހާލިއަކަސް ކައްކާފަ ކާންދޭނެ މީހަކު ނެތިފައި ހުއްޓާ ކަކުލެއްގައި ރިއްސާލި ވާހަކަ ބުނީމާ ރަށަށް އަންނާނެ ދަރިއަކު ނުވި އެވެ. ލިބުނު ފުރުސަތުގެ ބޭނުން ހިފައި، ޑަކްޓަރަށް ދައްކަން ގެނައީ މިތަނަށެވެ. ބޭބެ އުޅެނީ އަށް، ނުވަ ބުރީގެ މަތީގަ އެވެ. ބޭބެގެ ފަޔަކަށް ލިބުނު ލުޔެއްނެތެވެ. ޑަކްޓަރު ކިތަންމެ ބައިވަރު ބޭހެއް ލިޔެފަ ދިނަސް ބޭބެގެ ފައި ރަނގަޅު ވާނެ ހެއްޔެވެ. ބޭބެ މިހާރުވެސް ފަތިހު މޫދަށް ގޮސް ވެލިމޮޑެ ތެޔޮ ކޮޅެއް އުނގުޅާލައި ހެނދުގެ ބޭސް އަވީގައި ހުރެލަނިކޮށް ކިތަންމެ ތަނަކުން ފަޔަށް ލުއިވާނެއެވެ. ބޭބެ މިތާކު ކުރާނެ ކަމެއްނެތެވެ. އަބަދު އޮންނަން ޖެހެނީ ކޮޓަރި ތެރޭގަ އެވެ. އެއް އެނދުން ފޫހިވީމާ އަނެއް އެނދަށެވެ.
ބޭބެ މިހިރީ ކަނޑުމަތިން ހިފައިގެން ގެންނަ ކަނޑުމަތީ ދޫންޏެއްހެން ގެނެސް ފިޔަކޮށާލާފަ އެވެ. ކަނޑުމަތީ ދޫނީގެ ފައިގައި ވަރުނުހޭތީ ފިޔަވަޅު ނުނެގިފަ އެވެ. ބޭބެ މިއަދު މިހިރީ ބަލިކޮށްލާފަ އެވެ. ބޭބެއަކީ އެތައް ބަޔަކަށް ލޮނުކަން ރިހަމަސް ހޯދަން ބޭބެގެ އޮޑިގަނޑުގައި ފަތިސް ނަމާދުކޮށްގެން ނުކުންނަ މީހެކެވެ. އެކަމަކު މާލެ އަންނަން ޖެހުމުން އޮޑިގަނޑު ހުންނާނީ ހަރުގޭގަ އެވެ. ހަރުގެ ބާވެ ވިއްސާރަވެހި މަޑޫތައް ދޫވެ ހިންމިތަކުން ހަޅަނގު ފައިބާ އޮޑިގަނޑުގެ ހުންނާނީ ރޫޅޭން ކައިރިވެފަ އެވެ. އޮޑިއަށް ވިއްސާރަ ނުވެހޭ ގޮތަށް ހަރުގެގަނޑު ހިޔާކޮށްދޭށޭ ދަރިން ގާތު ކިޔާތާ ވެސް އެތައް ދުވަހެއް ވެއްޖެ އެވެ. އަޑުއިވުނު ދަރިއަކުނެތޭ ބުނެ ކޮރެއް ޖަހާލަމުން ހިނގައިގެންފި އެވެ. އަހަރެންނަށް ސުވާލެއް ވެސް ކޮށްލަން ފުރުސަތެއް ނުދީ އެވެ. ނުދައްކަން ހުރި ވާހަކަ ދެއްކިދާނެތީކަން ވެސް ނޭނގެ އެވެ.
