އީ-ސިނގިރޭޓް އުފައްދާ ކުންފުނި ޖޫލް ލެބްސްއިން ފުރާވަރު އުމުރުގެ ކުދިންނަށް ޓާގެޓް ކުރާ ކަމަށް ކުރެވޭ ތުހުމަތުތަކާ ގުޅޭ މައްސަލަތައް ހައްލު ކުރަން އެމެރިކާގެ ހަ ސްޓޭޓެއްގައި 462 މިލިއަން ޑޮލަރު ދައްކަން އެ ކުންފުނިން އެއްބަސްވެއްޖެ އެވެ.
ފުރާވަރު އުމުރުގެ ކުދިންނަށް ޓާގެޓް ކުރުމުގެ އިތުރުން އެ ކުންފުނީގެ ވޭޕްތަކަކީ ސިނގިރޭޓަށް ވުރެ ރަނގަޅު އަދި ދެވިހިފުން ކުޑަ އެއްޗެއްގެ ގޮތުގައި ދޮގު ހަދައި މާކެޓް ކުރާ ކަމަށް ވެސް ބައެއް ސްޓޭޓްތަކުން ތުހުމަތު ކުރެ އެވެ.
ކުންފުނިން ގާނޫނާއި ގަވާއިދާ ހިލާފު އަމަލެއް ހިންގި ކަމަކަށް އެއްބަހެއް ނުވެ އެވެ. އެކަމަކު ފައިސާ ދޭން އެއްބަސްވީ ކުންފުނީގެ މާޒީއާ ގުޅުން ހުރި މައްސަލަތަކެއް ހައްލުކުރަން ކަމަށް ބުންޏެވެ.
ޖޫލް ލެބްސްއާ ދެކޮޅަށް ކުރެވޭ ތުހުމަތުތަކާ ގުޅިގެން މިހާތަނަށް ޖުމްލަ އެއް ބިލިއަން ޑޮލަރު ދައްކާފައިވެ އެވެ.
ފުރާވަރު އުމުރުގެ ކުދިންނަށް ޓާގެޓް ކުރާ ކަމަށް ކުރެވޭ ތުހުމަތު އެ ކުންފުނިން ދޮގުކުރެ އެވެ. އެހެން ނަމަވެސް ޕެކޭޖް ކުރުމުގައި ބޭނުންކުރާ ކުލަތަކާއި، ތަފާތު ރަހަތަކާއި، އިޝްތިހާރުތަކުގައި މޮޑެލް ކުރާ ޒުވާން ކުދިން ބޭނުންކުރަނީ އެ ބޭނުމުގައި ކަމަށް އެކި ފަރާތްތަކުން ތުހުމަތުކުރެ އެވެ.
ސެންޓާޒް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ)ގެ ތަފާސްހިސާބް ދައްކާ ގޮތުން 2022 ވަނަ އަހަރު އެމެރިކާގައި 2.5 މިލިއަނަށް ވުރެ ގިނަ ސްކޫލު ކުދިން އީ-ސިނގިރޭޓް ބޭނުންކުރި އެވެ.
ސިނގިރޭޓަށް ދެވިހިފާފައިވާ މީހުން އެކަން ހުއްޓާލުމަށް އީ-ސިނގިރޭޓްގެ ބޭނުންކުރެ އެވެ. އެހެން ނަމަވެސް، އީ-ސިނގިރޭޓުގެ ވޭޕާގައި ހުންނަ ކުޑަ މިންވަރެއްގެ ކެމިކަލްގެ ތެރޭގައި ނިކޮޓީން ހިމެނޭތީ، އީ-ސިނގިރޭޓަކީ ވެސް ސިއްހަތަށް ގެއްލުން ހުރި އެއްޗެކެވެ.
އޭގެ އިތުރުން ވޭޕް ކުރުމަކީ އެއްވެސް ގެއްލުމެއް ނުލިބޭ ކަމެއްގެ ގޮތުގައި ފުރާވަރު އުމުރުގެ ކުދިންނަށް ވިސްނެމުން ދާތީ، އެކަން ކުރާ ކުދިން އިތުރުވަމުންދާކަމުގެ ކަންބޮޑުވުންތައް ގިނަ އެވެ.
