މިލާން (އޭޕްރީލް 13) - ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ރޭ އޭސީ މިލާނުން އަމިއްލަ ދަނޑުގައި 1-0 ނަޕޯލީ ބަލިކޮށް މުބާރާތުގެ ސެމީ ފައިނަލަށް ދިއުމުގެ އުންމީދުގައި ބޮޑު މޮޅެއް ހޯދައިފި އެވެ.
މިއާ އެކު، އަންނަ ހަފްތާގައި ނަޕޯލީ ދަނޑުގައި އެއްވަރުކޮށްލައިގެން ވެސް މިލާނަށް މުބާރާތުގެ ސެމީ ފައިނަލަށް ދެވޭނެ އެވެ. މިލާނުން ވަނީ މީގެ 10 ދުވަސް ކުރިން އިޓާލިއަން ލީގުގައި ނަޕޯލީ ދަނޑުގައި އެ ޓީމު އަތުން 4-0 އިން މޮޅުވެފަ އެވެ.
މިލާނުގެ ސަންސީރޯ ސްޓޭޑިއަމްގައި ރޭ ކުޅުނު މެޗު ފަށައިގެން ދެ ޓީމުގެ ފަރާތުން އަވަސް ކުޅުމެއް ފެނިގެންދިޔައިރު، ނަޕޯލީން ފޮނުވާލި ގިނަ ހަމަލާތަކެއް ހުއްޓުވުމުގައި މިލާންގެ ގޯލުގައި ހުރި ފްރާންސްގެ ކީޕަރު މައިކް މައިންގްނޯން ވަނީ މޮޅު ކުޅުމެއް ދައްކައިފަ އެވެ.
އެ ގޮތުން، ނަޕޯލީގެ ވިންގް، ކްވިޗާ ކްރަވަޝްކޭލިއާ އާއި ޕިއޮޓްރޭ ޒިއެލިންސްކީ އަދި އަންދްރޭ-ފްރޭންކް ޒަމްބޯ އަންގީސާ ފޮނުވާލި ޝޮޓްތައް ކީޕަރު މައިންގްނޯން ވަނީ ހުއްޓުވައިފަ އެވެ.
މިލާނުގެ ހެނާންޑޭޒް (ކ) އަށް ނަޕޯލީގެ އަންގީސާ ފައުލުކުރަނީ: މި މެޗުގައި އަންގީސާ އަށް ވަނީ ރަތް ކާޑެއް ދައްކާފައި.
މި މެޗުގައި މިލާނުން ޖެހި ހަމައެކަނި ގޯލު މެޗުގެ 40 ވަަަނަ މިނިޓްގައި ޖެހީ އަލްޖީރިއާގެ މިޑްފީލްޑަރު، އިސްމާއިލް ބެނަސޭރު އެވެ. މިއީ އަމިއްލަ ހާފުގެ ތެރެއިން މިލާނުގެ ހުނަރުވެރި މިޑްފީލްޑަރު، ބްރަހިމް ޑިއާޒް ހިފައިގެން ދިޔަ ބޯޅައެއްގައި ތަނަވަސްކުރި އެޓޭކެއްގައި އޭރިއާތެރެއިން ބެނަސޭރު، ގޯލުގެ ކައިރީ ކަނަށް ބޯޅަ އަމާޒުކޮށްލައިގެން ޖެހި ގޯލެކެވެ.
ދެ ވަނަ ހާފުގައި ވެސް ނަޕޯލީގެ އެޓޭކްތަކެއް ފެނިގެންދިޔައިރު، އެ ޓީމުން މި މެޗު ނިންމާލަން ޖެހުނީ ކުޅުންތެރިއަކު މަދުކޮށެވެ. އެ ގޮތުން، މެޗުގެ 74 ވަނަ މިނިޓްގައި ނަޕޯލީގެ އަންގީސާ އަށް ރަތް ކާޑު ދެއްކިއިރު، އޭނާ ދެ ރީނދޫ ކާޑު ހޯދީ ހަތަރު މިނިޓް ތެރޭގަ އެވެ.
މެޗަށް ފަހު މިލާނުގެ ކޯޗު ސްޓެފާނޯ ޕިއޯލީ ބުނީ މެޗުން މޮޅުވުމުން ވަރަށް ހިތްހަމަޖެހޭ ކަމަށާއި އޮތް ހަމައެކަނި ހިތްނުތަނަވަސްކަމަކީ ޖެހުނީ ހަމައެކަނި އެއް ގޯލު ކަމަށްވުން ކަމަށެވެ.
ނަޕޯލީގެ ކޯޗު ލޫޝިއާނޯ ސްޕަލެއްޓީ ބުނީ ދެ ވަނަ ލެގުގައި އަމިއްލަ ދަނޑުގައި ކުޅޭއިރު، ނަތީޖާ ނެރެވޭނީ މުޅި ޓީމު އެކުގައި އެއް އަމާޒަކަށް ރަނގަޅަށް މަސައްކަތް ކޮށްގެން ކަމަށެވެ.
