ލަންޑަން (އޭޕްރީލް 12) - ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި މިރޭ ރެއާލް މެޑްރިޑާ ދެކޮޅަށް ރަށުން ބޭރުގައި ޗެލްސީ ނުކުންނައިރު، ޗެލްސީގެ ޒުވާން ކުޅުންތެރިން ލީޑަރުންނަށް ވާންޖެހޭ ކަމަށް އެ ޓީމުގެ ކޯޗު ފްރޭންކް ލަމްޕާޑް ބުނެފި އެވެ.
ޗެމްޕިއަންސް ލީގުގެ ކުއާޓާ ފައިނަލަށް ޗެލްސީ ދަތުރުކުރި ނަމަވެސް، ލީގުގައި އެ ޓީމުގެ ފޯމު ދަށެވެ. އިނގިރޭސި ލީގު ތާވަލްގައި ޗެލްސީ މި ވަގުުތު އޮތީ 11 ވަނައިގަ އެވެ.
ޗެލްސީގެ ކޯޗުކަމުން ގްރޭހަމް ޕޮޓާ ވަކިކޮށް، ލަމްޕާޑް، މި ސީޒަންގެ ނިޔަލަށް ވަނީ އެ ޓީމުގެ ކޯޗުކަމާ ހަވާލުވެފަ އެވެ.
މެޗުގެ ކުރިން ވާހަކަދައްކަމުން ލަމްޕާޑް ބުނީ ޗެލްސީއާ އަލަށް ގުޅުނު ޒުވާން ކުޅުންތެރިން ލީޑަރުންނަށް ވާންޖެހޭ ކަމަށެވެ. އަދި އެކަން ދަނޑުމަތިން ފެންނަންޖެހޭ ކަމަށް ވެސް ލަމްޕާޑް ގަބޫލުކުރެ އެވެ.
"ވަރަށް ޒުވާން ކުޅުންތެރިންތަކެއް ޓީމާ ގުޅިއްޖެ. އެ ކުޅުންތެރިންނަށް ލީޑަރުންނަށް ވާން ވަގުތުކޮޅެއް ދޭންޖެހޭ،" ލަމްޕާޑް ބުންޏެވެ.
"މިސާލަކަށް އެންޒޯ ފެނާންޑޭޒް. އޭނާގެ ފަރާތުން އަހަންނަށް ލީޑަޝިޕް އެބަ ފެނޭ. އެކަމަކު އޭނާގެ އުމުރުން އެންމެ 22 އަހަރު. މި ކަހަލަ މެޗުތަކުން މި ކުޅުންތެރިންނަށް ދެއްކޭނެ އެމީހުންގެ ގައިގައި ހުރި ލީޑަޝިޕްގެ ހުނަރު،" ލަމްޕާޑް ބުންޏެވެ.
މިދިޔަ ސީޒަންގެ ސެމީ ފައިނަލުން ރެއާލް ޖާގަ ހޯދީ ކުއާޓާގައި ފައިނަލުގައި ޗެލްސީގެ މައްޗަށް ކުރި ހޯދައިގެނެވެ.
ލަމްޕާޑް ބުނީ ރެއާލްގެ ދަނޑުގައި ކުޅޭއިރު ރެއާލްގެ ފެންވަރު ދެނެގަންނަންޖެހޭ ކަމަށެވެ.
"ބައެއް ކަންތައްތަކަކީ އަހަރަމެންގެ ބާރު އޮތް ކަންތައްތަކެއް ނޫން. އަހަރެންގެ ބާރުގައި ހުރި ކަންތައްތަކަށް މަސައްކަތްކުރަންޖެހޭނީ. އެއް ކަމަކީ ރެއާލްގެ ފެންވަރު އެނގިގެން، މެޗަށް ތައްޔާރުުވުން،" ލަމްޕާޑް ބުންޏެވެ.
ޗެލްސީ އާއި ރެއާލް ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
