ލަންޑަން (އޭޕްރީލް 12) - ބޮރޫޝިއާ ޑޯޓްމަންޑަށް ކުޅެމުންދާ އިންގްލެންޑްގެ ޒުވާން މިޑްފީލްޑަރު ޖޫޑް ބެލިންހަމް އަށް މި އަހަރުގެ ހޫނު މޫސުމުގެ ޓްރާންސްފާގައި ބިޑުނުކުރުމަށް ލިވަޕޫލުން ނިންމައިފި އެވެ.
ބެލިންހަމް، 19، ގެންދަން ލިވަޕޫލުން މަސައްކަތް ކުރަމުންދާ ކަމަށް ވަނީ އަޑުފެތުރިފަ އެވެ. ލިވަޕޫލުން ބެލިންހަމް ގެންދަން ބޭނުންވާ ނަމަ، ޓްރާންސްފާ ފީގެ ގޮތުގައި އެންމެ ކުޑަވެގެން 100 މިލިއަން ޕައުންޑް ހޭދަކުރަންޖެހޭނެ ކަމަށް ލަފާކުރެވެ އެވެ.
މި ސީޒަނަށް ފަހު ލިވަޕޫލަށް ބޮޑެތި ބަދަލުތަކެއް ގެންނަންޖެހޭ ކަމަށް އެ ޓީމުގެ ކޯޗު ޔާގެން ކްލޮޕް ބުނެފައިވާއިރު، ކުރިއަށް އޮތް ޓްރާންސްފާގައި އެއް ކުޅުންތެރިއަކަށް 100 މިލިއަން ޕައުންޑް (120 މިލިއަން ޑޮލަރު) ހޭދަކުރުމަކީ ކްލަބަށް އެންމެ ފައިދާވާނެ ގޮތް ކަމަށް ލިވަޕޫލުން ގަބޫލެއް ނުކުރެއެވެ.
އެހެންކަމުން، މި އަހަރުގެ ހޫނު މޫސުމުގެ ޓްރާންސްފާގައި ބެލިންގްހަމް ގެންދަން ލިވަޕޫލުން ކުރަމުންދާ މަސައްކަތްތައް ވަނީ މަޑު ޖައްސާލައިފަ އެވެ.
ލިވަޕޫލްގެ ކޯޗު ޔާގަން ކްލޮޕް ވަނީ މީގެ ކުރިން ބެލިންހަމް އަށް ތައުރީފްކޮށް، އެ ކުޅުންތެރިޔާ އަށް ޝައުގުވެރިވާކަން ބުނެފަ އެވެ.
"އެހާ ޅަ އުމުރުގައި ވަރަށް ގިނަ ކަންތައްތައް އޭނާގެ ފަރާތުން ފެނޭ. އަދި ދަސްކުރަންޖެހޭ ކަންތައްތައް ވެސް އެބަހުރި. އެކަމަކު ބެލިންގްހަމް އަކީ ވަރަށް މޮޅު ކުޅުންތެރިއެއް،" ކްލޮޕް ބުންޏެވެ.
ބާމިންހަމް ސިޓީން އުމުރުން 17 އަހަރުގައި 2020 ވަނަ އަހަރު ޑޯޓްމަންޑަށް ބަދަލުވި ބެލިންހަމް ވަނީ ޑޯޓްމަންޑަށް މި ސީޒަންގައި 37 މެޗު ކުޅެ، 10 ލަނޑު ޖަހައިފަ އެވެ.
ބެލިންހަމް ގަތުމުގެ ރޭހުގައި ދެން އޮތް ކްލަބްތަކުގެ ތެރެއިން ރެއާލް މެޑްރިޑުން ވެސް އޭނާ އަށް ބިޑް ކުރުމުގެ ރޭހުން ވަނީ ބޭރުވެފަ އެވެ. އެ ރޭހުގައި މެންޗެސްޓާ ސިޓީ އާއި މެންޗެސްޓާ ޔުނައިޓެޑުން ވެސް އޮތް ކަމަށް އިނގިރޭސި މީޑިއާ ރިޕޯޓްތައް ބުނެ އެވެ.
