ސްރީލަންކާގައި އަސްކަރީ މަރުކަޒެއް އެޅުމުގެ ނިޔަތެއް އެމެރިކާއިން ނުގެންގުޅޭ ކަމަށް ލަންކާގައި ހުންނަވާ އެމެރިކާގެ ސަފީރު ޖޫލީ ޗުންގް ވިދާޅުވެއްޖެ އެވެ.
ރިޕޯޓުތައް ބުނާ ގޮތުން އެމެރިކާގެ އިސް ދިފާއީ އޮފިޝަލެއް ދާދި ފަހުން ލަންކާއަށް ދަތުރުކުރެއްވި އެވެ. އެކަމާ ގުޅޭ ގޮތުން ޑެއިލީ މިރާއިން ކުރެއްވި ސުވާލަކަށް ޖަވާބު ދެއްވަމުން ޗުންގް ވިދާޅުވީ އަސްކަރީ މަރުކަޒެއްގެ އެޅުމުގެ ނިޔަތެއް ނެތް ކަމަށެވެ.
"އަސްކަރީ މަރުކަޒާ ގުޅޭ ގޮތުން ދަންނަވަން އޮތީ އަޅުގަނޑު ތަކުރާރުކޮށް ވެސް ދަންނަވާ ވާހަކަ. އަސްކަރީ މަރުކަޒެއް އެޅުމުގެ އެއްވެސް ނިޔަތެއް ނެތް."
އޭގެ އިތުރުން ބޭރު ގައުމެއްގެ ފަސްގަނޑުގައި އެމެރިކާގެ ސިފައިން މަރުކަޒުވެގެން ތިބުމަށް ފުރުސަތު ލިބޭ "ސޯފާ" އެއްބަސްވުމެއް އަލުން ގެނައުމުގެ ވިސްނުމެއް ވެސް ނެތް ކަމަށް ޗުންގް ވިދާޅުވި އެވެ.
ސްރީލަންކާއިން އެމެރިކާއާ އެކު އެފަދަ އެއްބަސްވުމެއްގައި އެންމެ ފުރަތަމަ ސޮއިކުރީ 1995 ގަ އެވެ. މިދިޔަ ފެބްރުއަރީ މަހު އެމެރިކާގެ ދިފާއީ އިސް އޮފިޝަލަކު ލަންކާއަށް ދަތުރު ކުރެއްވުމުން އަސްކަރީ މަރުކަޒު އެޅުމާއި އެއްބަސްވުން އަލުން އިއާދަކުރުމުގެ ވާހަކަތައް ދެކެވެން ފެށި އެވެ.
