މިހާރު ކުރިއަށްދާ ކ. ގުރައިދޫ ދާއިރާގެ މަޖިލިސް ބައި-އިލެކްޝަން ކެމްޕޭނުގައި ރައީސް އިބްރާހިމް މުހައްމަދު ސޯލިހު ކ. ގުޅިއަށް ވަޑައިގެން އަންނަ އަހަރު އެ ރަށުގެ ބަނދަރަށް ދިމާވެފައިވާ ޖާގައިގެ ދަތިކަމާއި ބޯހިޔާވަހިކަމުގެ މައްސަލައަށް ހައްލު ހޯދައިދެއްވާނެ ކަމަށް ވައުދުވެވަޑައިގެންފި އެވެ.
އެމްޑީޕީގެ ކެންޑިޑޭޓު އިބްރާހިމް ސާޒުގެ ކެމްޕޭނުގައި ވަޑައިގެން ގުޅީގެ ރައްޔިތުންނާ ވާހަކަދައްކަވަމުން ރައީސް ސޯލިހު ވިދާޅުވީ މިއީ ރާއްޖޭގެ ރައީސަކު އެ ރަށަށް މިދިޔަ 10 އަހަރު ތެރޭގައި ވަޑައިގެންނެވި ފުރަތަމަ ފަހަރު ކަމަށެވެ. އަދި އެމަނިކުފާނަށްވެސް ގުޅިއަށް ވަޑައިގެންނެވުން ލަސްކަން ގަބޫލުކުރައްވާ ކަމަށް ވިދާޅުވި އެވެ.
"އަޅުގަނޑުމެން ވެރިކަމާ ހަވާލުވިއިރު ގުޅީގައިހުރި ފެން ހުރީ ތަގައްޔަރުވެފައި، މިހާރު ގުޅީގައި ސާފު ފެން ލިބޭނެ، ރައްޔިތުން އެދުނުގޮތަށް މި ރަށުގެެ ފެނާ ނަރުދަމާގެ ނިޒާމް ނިމި ޒުވާނުން ބޭނުންވާ ފުޓްބޯޅަ ދަނޑާއި ފުޓްސަލް ދަނޑާއި، ސިއްހީ ދާއިރާއަށް ބޭނުންވާ ކަންކަމާއި، ސްކޫލަށް ބޭނުންވާ ކްލާސްރޫމުތައްވެސް ނިމި އެ ދަނީ ބޭނުންކުރަމުން."
މި ސަރުކާރުން ގުޅީގެ ތަރައްގީއަށް ގެނެސްދިން ބޮޑެތި ބަދަލުތައް ފާހަގަކުރައްވަމުން ރައީސް ވިދާޅުވީ މީގެ ކުރިން ގުޅިއަކީ، ކުރީގެ ސަރުކާރުތަކަށް 'ގެއްލިފާ' އޮތް ރަށެއް ކަމަށެވެ. ނަމަވެސް މި ސަރުކާރުން ގުޅީގެ ރައްޔިތުން އެންމެ ބޭނުންވެފައި އޮތް ބިން ހިއްކުމުގެ އަމަލީ މަސައްކަތްވެސް މިހާރު ފެށިފައިވާކަން ރައީސް ފާހަގަކުރެއްވި އެވެ.
"ތިބޭފުޅުން ތިބޭނުންވާ ބިން މި ރަށަށް ލިބި، ރައްޔިތުންނަށް ބޭނުންވާ ބޯހިޔާވަހިކަމުގެ މަޝްރޫއުވެސް އިރާދަކުރެއްވިއްޔާ މިތަނުން ފެނިގެންދާނެ... ކުރިއަށް އޮތް ރިޔާސީ ދައުރުގެ މެނިފެސްޓޯ އެކުލަވާލުމުގެ މަސަައްކަތް އަޅުގަނޑުމެން ކުރަމުން މިދަނީ. ތިބޭފުޅުންނަށް ވައުދުވަން އަންނަ އަހަރުގެ ބަޖެޓުގައި މި ރަށުގެ ބަނދަރު ބޮޑުކުރުމުގެ މަސައްކަތް ހިމަނާނަން،" ރައީސް ވިދާޅުވި އެވެ.
އެއަށްފަހު ރައީސް ވަނީ ދާއިރާތައް ތަރައްގީކުރުމުގައި ރައްޔިތުން މަޖިލީހުގެ މެންބަރަކީ ސަރުކާރަށް ތާއީދުކުރާ ސަރުކާރާއެކު މަސައްކަތް ކުރާ ފަރާތަކަށް ވުމުގެ މުހިންމުކަން ފާހަގަކުރައްވާފަ އެވެ. ނަމަވެސް، ތަފާތު ހިޔާލެއްގެ މެންބަރަކު ހުރުމުން މި ސަރުކާރުގެ ތަރައްގީގެ މަޝްރޫއުތަކުން ބާކީ ނުވާނެކަންވެސް ރައީސް ފާހަގަކުރެއްވި އެވެ.
ގުރައިދޫ ދާއިރާގެ ބައި އިލެކްޝަން ބާއްވަނީ އެ ދާއިރާގެ މެންބަރު އިބްރާހިމް ރިޒާ، މިދިޔަ މަހުގެ 23 ވަނަ ދުވަހު އަވަހާރަވުމާ ގުޅިގެންނެވެ. ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިއާގައި ބޭސްކުރައްވަމުން ގެންދަވަނިކޮށެވެ. މި އިންތިހާބުގެ ވޯޓުލުން އޮންނާނީ އަންނަ ހޮނިހިރު ދުވަހު އެވެ.
