ޔޫތު މިނިސްޓްރީން ދޭ މާލީ އެހީ ހުރިހާ ކްލަބަކަށް ހަމަހަމަވާން ޖެހޭ ކަމަށް ބުނެ، ފުރަތަމަ ޑިވިޝަންގައި ވާދަކުރަމުން އަންނަ ކްލަބް ގްރީން ސްޓްރީޓްސް އިން ރޭ ބަޔާނެއް ނެރެފި އެވެ.
ގްރީން ސްޓްރީޓްސް އިން މި ބަޔާން ނެރުނީ ޔޫތު މިނިސްޓްރީން ފުރަތަމަ ޑިވިޝަން ކްލަބްތަކަށް ދިން މާލީ އެހީތެރިކަމުގެ ތެރެއިން މާޒިޔާ ސްޕޯޓްސް އެންޑް ރެކްރިއޭޝަން އަށް އިތުރަށް ފައިސާ ދީފައިވާ ކަމަށް ބުނެ، އެ ކަމަށް ހިތްހަމަނުޖެހުން ފާޅުކުރުމުގެ ގޮތުންނެވެ.
ރާއްޖޭގެ ޗެމްޕިއަނުންގެ ގޮތުގައި ސަރަަހައްދީ ފުޓްބޯޅަ މުބާރާތް އޭއެފްސީ ކަޕްގައި ގައުމު ތަމްސީލްކުރާ މާޒިޔާ އަށް އިތުރަށް ފައިސާ ދީފައި ވަނީ ޔޫތު މިނިސްޓްރީން އޭއެފްސީ ކަޕްގެ ގްރޫޕް ސްޓޭޖުގައި ވާދަކުރާ ޓީމަށް ދޭ އެހީތެރިކަމުގެ ގޮތުގަ އެވެ. މީގެ ކުރިން އެ ގޮތަށް 2020 ވަނަ އަހަރު ޓީސީ ސްޕޯޓްސް ކްލަބަށް ވެސް ވަނީ ދީފަ އެވެ.
މާލީ ނުތަނަވަސްކަމެއްގެ ތެރޭގައި މި ވަގުތު އޮތް ކްލަބް ގްރީން ސްޓްރީޓްސް އަކީ ފުރަތަމަ ޑިވިޝަނުގެ އަށް ޓީމުގެ ތެރެއިން ޕްރެކްޓިސް ވެސް ނުފެށި އޮތް ދެ ޓީމުގެ ތެރެއިން އެއް ޓީމެވެ. މާލީ ކަންކަމާއި ޓީމު ހިންގުމުގެ އެހެނިހެން މައްސަލަތަކަށް ހައްލެއް ނުލިބި އޮތުމުން ޕްރެކްޓިސް ނުފެށޭތީ ގްރީން ސްޓްރީޓްސް އާއި ޔުނައިޓެޑް ވިކްޓަރީ (ޔޫވީ) މިއަދު ފަށާ ސީޒަނުގެ ފުރަތަމަ މުބާރާތް، ޕްރެޒިޑެންޓްސް ކަޕްގައި ނުކުޅެ އެވެ.
ގްރީން ސްޓްރީޓްސް އިން ރޭ ނެރުނު ބަޔާނުގައި ބުނެފައިވަނީ ފުރަތަމަ ޑިވިޝަން ކޮންމެ ކްލަބަކަށް ސަރުކާރުން ދިން މާލީ އެހީތެރިކަމަށްވާ 247،500 ރުފިޔާގެ އިތުރުން މާޒިޔާ އަށް އެއް މިިލިއަން ރުފިޔާ ދީފައި އޮތުން ބަލައިނުގަނެވޭ ކަމަށެވެ.
"މި ގޮތަށް ހަމަހަަމަ ނޫން ގޮތަކަށް ފަންޑް ދިނުން ބަލައެއް ނުގަނެވޭ. މީގެ އިން ނުކުންނަ ނަތީޖާ އަކީ އެއް ކްލަބަށް މާބޮޑަށް ރަނގަޅަށް ކަންކަން ފަހިކޮށްދިނުމުން އެހެން ކްލަބްތައް ކުރާ މަސައްކަތް ހީނަރުވާކަން. މިނިސްޓްރީގެ މެންޑޭޓަކީ ރާއްޖޭގެ ފުޓްބޯޅަ ކުރިއެރުވުން، އެކަމަކު، މި ފަދަ ގޮތަކަށް ކަންތައް ކުރުމަކީ ފުޓްބޯޅައިގެ ކުރިއެރުމަށް ވެސް ހުރަހެއް،" ގްރީން ސްޓްރީޓްސްގެ ބަޔާނުގައިވެ އެވެ.
ގްރީން ސްޓްރީޓްސް އިން ނެރެފައިވާ ބަޔާން
ގްރީން ސްޓްރީޓްސް އިން ވަނީ މިނިސްޓްރީގެ މި އަމަލު ކުށްވެރިކުރާ ކަމަށް ބުނެ، މިކަން ރިވިއު ކުރުމަށް ފަހު ވީ އެންމެ އަވަަހަށް އިންސާފުވެރި ފިޔަވަޅެއް މިކަމުގައި އެޅުމަށް ގޮވާލައިފަ އެވެ.
"މިނިސްޓްރީން މި ފަދަ ކަންކަމުގައި ދެފުށްފެންނަ އުސޫލެއްގެ ތެރެއިން ކަންކަން ކޮށް، ހުރިހާ ޓީމަކަށް ހަމަަހަމަވާނެ ގޮތަށް ކުރިއަށް އޮތްތަނުގައި ވެސް އަމަލުކުރާނެ ކަމަށް އުންމީދުކުރަން،" ގްރީން ސްޓްރީޓްސް އިން ބުނެފައިވެ އެވެ.
ގްރީން ސްޓްރީޓްސް އިން ބުނީ މިކަމުގައި އެ ކްލަބާ ބައިވެރިވެ، ޝުއޫރުފާޅުކުރާ އެހެން ޓީމުތަކާ އެކުގައި ތިބި ކަމަށެވެ.
ޓީސީ ސްޕޯޓްސް ކްލަބްގެ އިސް ހިންގުންތެރިޔާ، އަދި ކުރީގެ ސްޕޯޓްސް މިިނިސްޓަރު، އަހުމަދު ނަޝީދު (ޑޭވް) ވަނީ މިނިސްޓްރީން މި ގޮތަށް އެއް ކްލަބަށް އިތުރަށް ފައިސާ ދީފައި އޮތް އޮތުން ކުށްވެރިކޮށް މި މައްސަލަ އެންޓިކޮރަޕްޝަން ކޮމިޝަން (އޭސީސީ) އަށް ހުށަހަޅަން ޖެހޭނެ ކަމަށް ވިދާޅުވެފަ އެވެ.
