ބީބީސީއަކީ "ސަރުކާރުން ފަންޑުކުރާ މީޑިއާއެއް" ކަމަށް ޓްވިޓާގެ މައި އެކައުންޓުގައި ލޭބަލް ކުރުމުން، އެ ކުންފުނިން ޓްވިޓާއަށް ޝަކުވާ ހުށަހަޅައިފި އެވެ.
ބީބީސީއިން އެދިފައި ވަނީ އެކަން ވީ އެންމެ އަވަހަކަށް ހައްލުކޮށް ދިނުމަށެވެ. ބީބީސީއިން ބުނީ އެއީ "އަބަދުވެސް މިނިވަން ކުންފުންޏެއް" ކަމަށެވެ.
"އަޅުގަނޑުމެންނަށް ފަންޑު ކުރަނީ އަޅުގަނޑުމެންގެ ލައިސެންސް ފީ މެދުވެރިކޮށް އިނގިރޭސި އާއްމުން،" ބީބީސީއިން ބުންޏެވެ.
އެކަމާ ގުޅިގެން ޓްވިޓާގެ ވެރިޔާ ބިލިއަނަރު އެލޮން މަސްކް އިޝާރާތް ކުރީ ޓްވިޓާ ލޭބަލްއަށް އިތުރު ތަފްސީލް ހިމެނުމުގެ ވިސްނުމަށެވެ.
އެގޮތުން ފަންޑުކުރާ ސީދާ ފަރާތްތައް އެނގޭނެ ގޮތަށް ލޭބަލް ހަދަން ވިސްނަމުންދާ ކަމަށް މަސްކް އިޝާރާތް ކުރި އެވެ. އެކަމަކު އެއީ ހުރިހާ ނޫސްތަކާ މެދު އަމަލުކުރާނެ އުސޫލު ކަމެއް ސާފެއް ނޫނެވެ.
މަސްކް ބީބީސީއަށް ފޮނުވި އީމެއިލެއްގައި ބުނީ ޓްވިޓާގެ އަމާޒަކީ ހަގީގަތާއި ދެފުށްފެންނަ ފުރިހަމަ އުސޫލެއް ތަންފީޒު ކުރުން ކަމަށެވެ.
"އަޅުގަނޑު ދެކޭ ގޮތުގައި މީޑިއާ ކުންފުނިތަކުން އަމިއްލަ ކުންފުންޏާ މެދު ވިސްނައި، ހަގީގަތެއް ނެތް ގޮތުގައި ވަކި އަތަކަށް ނުޖެހޭ ކަމަށް ބުނުން ހުއްޓާލަން ޖެހޭ."
"ހުރިހާ ކުންފުންޏެއްގައި ވެސް ވަކި އަތަކަށް ވިސްނުން ހުންނާނެ. ބައެއް ކުންފުނިތަކުގައި އެގޮތް ބޮޑު. އަޅުގަނޑު ޓްވިޓާގައި ބީބީސީ ފޮލޯކުރަނީ، އެއީ ވަކިއަތަކަށް ޖެހުން އެންމެ ކުޑަ އެއް ނޫސް ކަމަށް ފެންނާތީ."
އިނގިރޭސިވިލާތުގައި ލައިސެންސް ފީގެ ގޮތުގައި ކޮންމެ އަހަރަކު ދައްކަން ޖެހެނީ 197 ޑޮލަރެވެ. އެއީ އިނގިރޭސި ގާނޫނުގެ ދަށުން ޓީވީ ބްރޯޑްކާސްޓާއި ލައިވް ސްޓްރީމް ބެލުމަށް ކަނޑައެޅި ފީއެކެވެ. އެކަން ހަމަޖެއްސީ އިނގިރޭސި ސަރުކާރުން ނަމަވެސް، ފީ ދައްކަނީ ވަކިވަކި ގޭބިސީތަކުގެ އަމިއްލަ ފަރުދުންނެވެ.
އިނގިރޭސިވިލާތުގެ ގައުމީ ބްރޯޑްކާސްޓަރުގެ ހައިސިއްޔަތުން ބީބީސީ އޮޕަރޭޓްކުރަނީ ސަރުކާރާ އެކު އެއްބަސްވެފައިވާ "ރޯޔަލް ޗާޓަރު"ގެ ދަށުންނެވެ. އޭގައި ބުނަނީ ބީބީސީއަކީ "މިނިވަން" ކުންފުންޏަކަށް ވާން ޖެހޭނެ ކަމަށެވެ.
މީގެ ކުރިން ޓްވިޓާއިން ވަނީ އެމެރިކާގެ ޕަބްލިކް ބްރޯކާސްޓަރު އެންޕީއާރްގެ ޓްވިޓާ އެކައުންޓުގައި ވެސް ސަރުކާރުން ފަންޑުކުރާ ކަމަށް ލޭބަލްކޮށްފަ އެވެ. އެންޕީއާރުން ބުނީ އެ ލޭބަލް ބަދަލުނުކުރާ ނަމަ، އެ އެކައުންޓު ބޭނުންކުރުން ހުއްޓާލާނެ ކަމަށެވެ.
ލައިސެންސް ފީ މެދުވެރިކޮށް 2022 ވަނަ އަހަރު ބީބީސީއަށް 4.7 ބިލިއަން ޑޮލަރު ލިބުނެވެ، އެއީ ކުންފުނީގެ ޖުމްލަ އާމްދަނީގެ 71 ޕަސެންޓެވެ. ބާކީ ފައިސާ ހޯދީ އިޝްތިހާތާއި ހިލޭ އެހީ އާއި އެހެނިހެން ގޮތްތަކުންނެވެ.
އޭގެ އިތުރުން ބީބީސީގެ ބައިނަލްއަގްވާމީ މަސައްކަތްތައް ކުރާ ބީބީސީ ވޯލްޑް ސާވިސްއަށް ކޮންމެ އަހަރަކު ވެސް އިނގިރޭސި ސަރުކާރުން 90 މިލިއަން ޕައުންޑަށް ވުރެ ބޮޑު އަދަދެއް ފޯރުކޮށްދެ އެވެ.
