މިއުނިކް (އޭޕްރީލް 9) - ނެދަލެންޑްސްގެ ޑިފެންޑަރު މަތައިސް ޑި ލިޓް ޖެހި މޮޅު ގޯލުން ރޭ 1-0 އިން ފްރެއިބާގް ބަލިކޮށް ޖަރުމަނު ލީގުގެ އެއް ވަނަ މަގާމު ބަޔާން މިއުނިކުން ދަމަހައްޓައިފި އެވެ.
ލީގުގެ އެއް ވަނައިގައި ބަޔާން އޮތީ 27 މެޗުން 58 ޕޮއިންޓާ އެކު އެވެ. ލީގުގައި ރޭ، ޔޫނިއަން ބާލިން އަތުން 2-1 އިން މޮޅުވި، ބޮރޫޝިއާ ޑޯޓްމަންޑް ދެ ވަނައިގައި އޮތީ 27 މެޗުން 56 ޕޮއިންޓް ހޯދައިގެންނެވެ. ތިން ވަނައިގައި އޮތް ޔޫނިއަން ބާލިން އަށް 27 މެޗުން ވަނީ 51 ޕޮއިންޓް ލިބިފަ އެވެ.
ފްރައިބާގް ދަނޑުގައި ރޭ ކުޅުނު މެޗުގައި ތޯމަސް ޓުޗެލްގެ އިރުޝާދުގެ ދަށުން ސަޑިއޯ މާނޭ ވަނީ ފުރަތަމަ ފަހަރަށް ބަޔާން ޓީމުގެ ފުރަތަމަ އެގާރައިގައި ހިމެނިގެން ކުޅެފަ އެވެ.
މިދިޔަ އަންގާރަ ދުވަހު ޖަރުމަނު ކަޕުން ބަޔާން ކަޓުވާލި ފްރައިބާގަށް ރޭ ގޯލު ޖަހައިދޭން ރިޓްސޫ ޑޯއާން ޖެހި ބޯޅަ ގޯލުގެ ދަނޑި އަށް އަމާޒުވިއިރު، ރޯލާންޑް ސަލާއި ޖެހި ބޯޅަ ބަޔާންގެ ކީޕަރު ޔެން ސޮމާ ވަނީ މަތަކޮށްފަ އެވެ.
މި މެޗުގައި ބަޔާނުން ޖެހި ހަމައެކަނި ލަނޑު ކާމިޔާބުކުރީ 50 ވަނަ މިނިޓްގައި ޑި ލިޓް އެވެ. ބަޔާންގެ ޖަމާލް މުސިއާލާ ދިން ބޯޅަ ކޮންޓްރޯލް ކުރުމަށް ފަހު އޭރިއާބޭރުން ޑި ލިޓް ޖެހި ބާރު ބޯޅަ ގޯލުގެ މަތީ ކަނަށް އަމާޒުވިއިރު، ގޯލުގައި ހުރި ފްރައިބާގްގެ ކީޕަރު، މާކް ފްލެކެން އަށް އެ ބޯޅަ ހުއްޓުވަން ކުރެވޭނެ މާ ބޮޑު ކަމެއް ނެތެވެ.
ޑޯޓްމަންޑަށް ރޭގެ މެޗުގައި ލީޑުނަގައިދިނީ ޑޮންޔެލް މާލެން އެވެ. ކެވިން ބޭރެންސް ވަނީ ގޯލެއް ޖަހައިދީ ޔޫނިއަން ބާލިން އަށް އެއްވަރުކޮށްދީފަ އެވެ. އެކަމަކު، ބަދަލަކަށް ކުޅެން އަރައި، 18 އަހަރުގެ ޔޫސެފާ މުކޯކޯ ވަނީ ޑޯޓްމަންޑް މޮޅުކޮށްދިން ގޯލު ޖަހައިފަ އެވެ.
ޖަރުމަނު ލީގުގައި ރޭ ކުޅުނު އެހެން މެޗުތަކަށް ބަލާއިރު، ޒަބީ އަލޮންސޯ ކޯޗުކޮށްދޭ ބަޔާ ލެވަކޫސަނުން ވަނީ 3-1 އިން ފްރޭންކްފާޓް ބަލިކޮށްފަ އެވެ. ހާތާ ބާލިން ދަނޑުގައި އާރްބީ ލައިޕްޒިގު ވަނީ 1-0 އިން ކުރިހޯދައިފަ އެވެ.
