ދުނިޔޭގައި ކޮންމެ ހަ މީހަކުން އެކަކަށް ދަރިމައިވުމުގެ މައްސަލަ ދިމާވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯއިން ހެދި ދިރާސާއަކަށް ފަހު ނެރުނު ރިޕޯޓުން އެނގުނު ގޮތުގައި ދަރިމައިވުމުގެ މައްސަލަ ދިމާވުމުގައި މުއްސަނދި، މެދުފަންތި އަދި ފަގީރު ގައުމުތަކުގެ މެދުގައި މާ ބޮޑު ތަފާތެއް ނެތެވެ.
މުއްސަނދި ގައުމުތަކުގެ 17.8 ޕަސެންޓު މީހުންނަށް އެ މައްސަލަ ދިމާވާ އިރު ފަގީރު އަދި މެދުފަންތީގެ ގައުމުތަކުގެ 16.5 ޕަސެންޓު މީހުންނަށް އެކަން ދިމާވެ އެވެ.
ޑަބްލިއުއެޗްއޯއިން ގޮވާލަނީ ހުރިހާ ގައުމެއްގައި ވެސް ދަރިމައިވުމުގެ މައްސަލައާ ގުޅޭ ފަރުވާތައް ފަސޭހައިން ލިބޭނެ ގޮތް ހެދުމަށެވެ.
ދަރިމައިވުމުގެ މައްސަލަ ހުންނަ ކަމަށް ޑަބްލިއުއެޗްއޯއިން ކަނޑައަޅަނީ ދޭތެރެ ދުރުނުކޮށް 12 މަސް ވަންދެން ޖިންސީ ގުޅުން ހިންގައިގެން ވެސް މާބަނޑު ނުވުމުންނެވެ.
އެ މައްސަލައަށް ހާއްސަ ފަރުވާތަކުގެ ތެރޭގައި ބައެއް ބޭހާއި ސާޖަރީ އަދި އައިވީއެފް ފަދަ ކަންކަން ހިމެނެ އެވެ. އައިވީއެފްއަކީ އަގުބޮޑު ފަރުވާއަކަށްވާ އިރު، ބައެއް މުއްސަނދި ގައުމުތަކުގައި ވެސް ގަައުމީ ހެލްތު އިންޝުއަަރެންސް މެދުވެރިކޮށް އައިވީއެފް ހެދެނީ ގިނަ ޝަރުތުތަކެއް ފުރިހަމަވުމުންނެވެ.
ޑަބްލިއުއެޗްއޯއިން ބުނީ ގިނަ ގައުމުތަކުގައި ދަރިމައިވުމުގެ މައްސަލައަށް ހަރަދު ކުރަން ޖެހެނީ ރައްޔިތުންގެ އަމިއްލަ ޖީބުން ކަމަށެވެ. އޭގެ ސަބަބުން އާއިލާތަކަށް ބޮޑު މާލީ ބުރައެއް ކުރިމަތިވެ އެވެ.
