ރަޝިއާގެ ސެއިންޓް ޕީޓާޒްބާގް ސިޓީގެ ކެފޭއެއްގައި ބޮމެއް ގޮއްވާލައި ބްލޮގަރެއް މަރުވުމުން، ޝައްކު ކުރެވޭ އަންހެނަކު ހައްޔަރުކޮށްފި އެވެ.
އާދީއްތަ ދުވަހުގެ ހަމަލާގައި މަރުވި ވްލެޑްލެން ޓަޓާސްކީއަކީ ޔޫކްރެއިންގައި ކުރަމުންދާ ހަނގުރާމައަށް ތާއީދުކޮށް ބްލޮގް ކުރާ މަގްބޫލް ޝަހުސިއްޔަތެކެވެ.
ތަހުގީގީ ޓީމުން ހޯމަ ދުވަހު ހައްޔަރު ކުރީ އުމުރުން 26 އަހަރުގެ ޑާރްޔާ ޓްރެޕޯވާ އެވެ. އޭނާއަކީ އިންޓީރިއާ މިނިސްޓްރީން ހޯދަމުންދާ މީހުންގެ ލިސްޓުގައި ވަރަށް ފަހުން ހިމެނި ބްލޮގަރެކެވެ.
ރަޝިއާގެ އިންޓީރިއާ މިނިސްޓްރީން ބުނީ ކެފޭގައި ބޮން ގޮއްވާލީ ޓަޓާސްކީއަށް ހަދިޔާއެއްގެ ގޮތުގައި ދިން ސްޓެޗޫ ލާފައި އޮތް ފޮށި ތެރޭގައި ބޮން ފޮރުވައިގެން ކަމަށެވެ.
ޓްރެޕޯވާއަކީ ޔޫކްރެއިން ހަނގުރާމައާ ދެކޮޅަށް އަޑުއުފުލާ މީހެކެވެ. ސޯޝަލް މީޑިއާގައި ދައުރުވާ ވީޑިއޯތަކުން ފެންނަނީ އަންހެނަކު ފޮށި ހިފައިގެން ކެފޭއަށް ވަންނަ ތަނެވެ.
އެ ހަމަލާގައި 30 އަށް ވުރެ ގިނަ މީހުންނަށް އަނިޔާވި އެވެ. އިދާރާތަކުން ބުނީ އެ މައްސަލަ ވަރަށް ސީރިއަސްކޮށް ތަހުގީގު ކުރަމުންދާ ކަމަށެވެ.
ބެލެވޭ ގޮތުގައި އެއީ ގިނަ ބަޔަކު ބައިވެރިވެގެން، ވަރަށް ބޮޑަށް ރާވައިގެން ދިން ހަމަލާއެއް ކަމަށް ވެސް އިދާރާތަކުން ބުންޏެވެ. އިދާރާތަކުން ބޮޑަށް ތުހުމަތު ކުރަނީ ޔޫކްރެއިން ޖާސޫސީ އެޖެންޓުންނެވެ.
އޭގެ އިތުރުން ޖަލުގައި ބަންދުކޮށްފައި ހުރި ރަޝިއާގެ އިދިކޮޅު ލީޑަރު އެލެކްސީ ނަވަލްނީއާ ގުޅުން ހުރި މީހުންގެ އަތެއް ވާ ކަމަށް ވެސް ތުހުމަތު ކުރެވެ އެވެ.
