ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދުކުރަން ނިންމީ ގައުމަށް އިޖުތިމާއި އަދި އިގުތިސާދީ ހަމަޖެހުން ބޭނުންވާތީ ކަމަށް ޖޭޕީ ދޫކުރައްވާ މިއަދު އެމްޑީޕީއާ ގުޅިވަޑައިގެން މަޖިލީހުގެ އިސްދޫ ދާއިރާގެ މެމްބަރު އަލީ ހަމީދު ވިދާޅުވެއްޖެ އެވެ.
އަލީ ހަމީދު އެމްޑީޕީއާ ގުޅިވަޑައިގަތީ ރައީސް ސޯލިހާއެކު ކޯލިޝަން ނުހަދާ ޖޭޕީގެ ލީޑަރު ގާސިމް އިބްރާހިމް ރިޔާސީ އިންތިހާބުގައި ވާދަކުރައްވަން ނިންމެވުމާ ގުޅިގެންނެވެ. އެމްޑީޕީއާ ގުޅިވަޑައިގަތުމަށްފަހު "އަދަދު" އަށް މިއަދު ދެއްވި އިންޓަވިއުއެއްގައި އަލީ ހަމީދު ވިދާޅުވީ، ރާއްޖެއަށް ދިމާވާ އެންމެ ބޮޑު މައްސަލައަކީ ގައުމުގެ ހަމަޖެހުން ގެއްލުން ކަމަށާއި ގައުމުގެ ހަމަޖެހުމަށްވުރެ ބޮޑު މަސްލަހަތެެއް އޮވެގެންނުވާނެ ކަމަށެވެ.
"އިޖުތިމާއީ ހަމަޖެހުމާއި އަދި އިގުތިސޯދީ ހަމަޖެހުމަކީ ގައުމު ހިންގުމާއި ގައުމުގެ މުސްތަގުބަލަށްޓަކާ ކޮންމެހެން ލާޒިމު ކަމެއް. މިދެންނެވި ފަދަ ހަމަޖެހުމެއް ރައްޔިތުންނާ ހަމައަށް ގެނެވުނު ހަމައެކަނި ވެރިޔަކީ ރައީސް ސޯލިހު،" އަލީ ހަމީދު ވިދާޅުވި އެވެ.
އެގޮތުން، ގާނޫނާ ހިލާފަށް އެއްވެސް ބަޔަކު ބަންދުކޮށް ގާނޫނާއި ގަވާއިދުތަކާ ހިލާފަށް ބައެއްގެ މުދަލަށް މި ސަރުކާރުން ގެއްލުންދީ އަތުލި މަންޒަރު ފެނިފައިނުވާކަން ހަމީދު ވިދާޅުވި އެވެ. އަދި، މި ވެރިކަމުގައި ރާއްޖެއަށް ރައީސް ސޯލިހު ގެންނެވި އިޖުތިމާއި އަދި އިގުތިސާދީ ހަމަޖެހުމަށް އެކަނި ބެލި ނަމަވެސް ރައީސް ސޯލިހަށް ދެވަނަ ދައުރެއް ދިނުން ލާޒިމް ކަމަށް ވެސް އަލީ ހަމީދު ވިދާޅުވި އެވެ.
އޭގެ އިތުރުން، އަލީ ހަމީދު ވިދާޅުވީ މި ސަރުކާރުން ހިންގާފައިވާ ތަރައްގީގެ ޕްރޮޖެކްޓުތަކަކީ ވެސް އެހެން ސަރުކާރުތަކާ އަޅާނުކިޔޭ ވަރުގެ ރަނގަޅު މަސައްކަތްތަކެއް ކަމަށެވެ.
އަލީ ހަމީދު އެމްޑީޕީއަށް ސޮއިކުރެއްވުމާއެކު، ރައްޔިތުންގެ މަޖިލީހުގައި އެ ޕާޓީއަށް ނިސްބަތްވާ މެމްބަރުންގެ އަދަދު 67 އަށް އެރީ އެވެ. އެންމެ ފަހުން އެމްޑީޕީއާ ގުޅިވަޑައިގަތީ، މިނިވަން މެމްބަރެއްގެ ގޮތުގައި އިންތިހާބުވި ވިލިނގިލީ ދާއިރާގެ މެމްބަރު ސައުދު ހުސައިން އެވެ.
ގާސިމް ރިޔާސީ އިންތިހާބަށް ވާދަ ކުރައްވަން ނިންމެވުމާއެކު އެ ޕާޓީގެ ކުރީގެ ސެކްރެޓަރީ ޖެނެރަލް، މިހާރު ރައީސް އޮފީހުގެ މިނިސްޓަރު އަހުމަދު ސަމީރު، އިމިގްރޭޝަން ކޮންޓްރޯލަރު މުހައްމަދު އަހްމަދު (ހަނަފީ), ހެރިޓޭޖު މިނިސްޓްރީގެ ޑެޕިއުޓީ މިނިސްޓަރު ވަލީދާ ވަލީދު، ރައްޔިތުންގެ މަޖިލީހުގެ ކުރީގެ މެމްބަރު އިބްރާހިމް ހަސަން (އެވިލާ)، އެމްޑަބްލިޔޫއެސްސީގެ މެނޭޖިން ޑިރެކްޓަރު ހަސަން ޝާހު، އެމްޓީސީސީގެ ސީއީއޯ އާދަމް އާޒިމްގެ އިތުރުން އެހެން ބައެއް ބޭފުޅުން ވެސް ވަނީ ޖޭޕީ ދޫކޮށްލައިފަ އެވެ.
އޭގެ އިތުރުން، ޓޫރިޒަމް މިނިސްޓަރު އަބްދުﷲ މައުސޫމް ވެސް ގާސިމަށް ތާއިދު ކުރެއްވުމުގެ ބަދަލުގައި، ރައީސް ސޯލިހަށް ތާއީދު ކުރައްވާކަން ވަނީ އިއުލާން ކުރައްވައިފަ އެވެ.
