ޕެރިހުގައި އަންނަ އަހަރު ބާއްވާ އޮލިމްޕިކްސްގެ އަންހެން ފުޓްބޯޅަ އިވެންޓަށް ކޮލިފައިވުމަށް ކުޅޭ އޭޝިއާގެ ކޮލިފައިން މުބާރާތުން ރާއްޖެ އާއި ބަންގްލަދޭޝް އިން ފަހު ވަގުތު ނަން ނަންނަގައިފި އެވެ.
މި މަހު މިޔަންމާގެ ޔަންގޮންގައި ކުރިއަށްދާ ކޮލިފައިން ގްރޫޕް ބީގެ މެޗުތަކުގައި ވާދަކުރަން އޮތީ ބަންގްލަދޭޝް އާއި ރާއްޖެ އާއި އިރާން އަދި މިޔަންމާ އެވެ. މި ކޮލިފައިން ބުރުގައި ބަންގްލަދޭޝް އިން ބައިވެރިނުވީ މާލީ ދަތިކަމާ ހުރެ ކަމަށް އެ ގައުމުގެ ފުޓްބޯޅަ ފެޑެރޭޝަނުން ބުނެފައިވާއިރު، އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ ކޮލިފައިންގައި ވާދަނުކުރަން ނިންމި ނިންމުމަކީ ކޯޗާއި ކުޅުންތެރިންގެ ނިންމުމެއް ކަމަށެވެ.
ރާއްޖެ އާއި ބަންގްލަދޭޝް ނުކުޅޭތީވެ، މިހާރު ކޮލިފައިން ގްރޫޕް ބީގައި އޮންނާނީ މިޔަންމާ އާއި އިރާންގެ މެދުގައި ކުޅޭ ދެ މެޗެވެ. މިތަނުން ކުރިހޯދާ ޓީމެއް އަނެއް ބުރަށް ކޮލިފައިވާނެ އެވެ. އެ ގޮތުން ފުރަތަމަ މެޗު އޮންނާނީ މި މަހު 5 ވަނަ ދުވަހު އެވެ. އަދި ދެ ވަނަ މެޗު ޝެޑިއުލްކޮށްފައިވަނީ އަށް ވަނަ ދުވަހަށެވެ.
ބަންގްލަދޭޝްގެ ފުޓްބޯޅަ ފެޑެރޭޝަންގެ ސެކްރެޓަރީ ޖެނެރަލް އަބޫ ނައީމް ޝޮހާގް ވިދާޅުވީ އެ ގައުމުގެ ސްޕޯޓްސް މިނިސްޓްރީ އާއި ނެޝަނަލް ސްޕޯޓްސް ކައުންސިލްގެ އެއްބާރުލުން ނުލިބި، މާލީ ގޮތުން އުނދަގޫ ހާލަތެއްގައި އޮތުމުން ބަންގްލަދޭޝް އަންހެން ޓީމު ކޮލިފައިންގައި ނުކުޅޭނެ ކަމަށެވެ.
ރާއްޖޭގެ ގައުމީ އަންހެން ޓީމުން ފެބްރުއަރީ މަހުން ފެށިގެން މި ކޮލިފައިން އަށް ޕްރެކްޓިސް ކުރަމުން އައީ ކޯޗު މުހައްމަދު ނިޒާމް (ނިޒާމްބެ)ގެ އިރުޝާދުގެ ދަށުންނެވެ.
ކޮލިފައިންގައި ބައިވެރިނުވި ސަބަބާ ގުޅޭގޮތުން ސުވާލުކުރުމުން ނިޒާމްބެ، "އަދަދު" އަށް ބުނީ މުބާރާތުގެ ޝެޑިއުލް އޮތްގޮތުން، ރާއްޖެ ކުޅޭ ދެ މެޗެއް ލާފައި އޮތީ ހަވީރު ކުޅޭ ގޮތަށް ކަމަށާއި ރޯދަ އަށް ހުރެ މިޔަންމާ ކަހަލަ ގައުމެއްގައި މިހާރު އެ ހުރި ހޫނުމިނުގައި މެޗުތައް ކުޅުމަކީ ދިވެހި ކުޅުންތެރިންނަށް އުނދަގޫވާނެ ކަމެއް ކަމަށެވެ.
"މިއީ ހަގީގަތުގައި ދިވެހި ކުޅުންތެރިން ދުވަހަކު ވެސް އެކްސްޕީރިއަންސް ކޮށްފައި ހުރި ކަމެއް ނޫން، މި ލެވަލްގެ މެޗުތަކެއް މިހެން ރޯދަ އަށް ހުރެ އެ ޓެމްޕަރޭޗާގައި ކުޅުމަކީ، ދެން އެ ރިސްކު އެހެން އޮތީމައާ އެކު ކުޅުންތެރިންނާ ވާހަކަ ދެއްކީމަ ކުޅުންތެރިން ވެސް އެ އަށް އެއްބަސްވީމަ ހަގީގަތުގައި ވާދަނުކުރަން ނިންމީ،" ނިޒާމްބެ ބުންޏެވެ.
"ކޮންމެ ގޮތެއް ވިޔަސް (ކުޅުންތެރިންނަށް) ރޯދަ ނުހިފާ ކުޅެން ބުނެ، އެ ގޮތަށް ފޯސް އެއް ނުކުރެވޭނެ. މި މުބާރާތުގައި އެހެން ސަބަބުތަކާ ހުރެ ވެސް އެބަހުރި ފަހު ވަގުތު ޓީމުތަކުން ބައިވެރިނުވަން ނިންމާފައި،"
ރަށްރަށުން އައި ކުޅުންތެރިންނާ އެކު، ގައުމީ އަންހެން ޓީމުން ޕްރެކްޓިސް ކުރިއަށްގެންދިއުމަށް ފަހު، އެންމެ ފަހު ވަގުތު މުބާރާތުގައި ވާދަނުކުރަން ނިންމުމާ އެކު، މިއީ އަނެއްކާ ވެސް އަންހެން ފުޓްބޯޅަ އަށް ގެއްލިގެންދިޔަ ބޮޑު ފުރުސަތެކެވެ.
ރާއްޖެ އާއި ބަންގްލަދޭޝްގެ އިތުރުން ފަހު ވަގުތު ދެން ބައިވެރިނުވާނެ ގައުމުތަކަކީ އަފްގާނިސްތާނާއި ފަލަސްތީނާއި ތުރުކުމެނިސްތާންގެ އިތުރުން ސަސްޕެންޝަންގެ ސަބަބުން މުބާރާތުން ފުރުސަތު ގެއްލުނު ސްރީ ލަންކާ އެވެ.
ދާދި ފަހުން ނިިމިގެންދިޔަ މޯލްޑިވްސް ސްޕޯޓްސް އެވޯޑްސްގައި އެންމެ މޮޅު އަންހެން ފުޓްބޯޅަ ކުޅުންތެރިޔާގެ މަގާމު ހޮވާފައިނުވެ އެވެ. މިދިޔަ އަހަރު ގައުމީ އަންހެން ޓީމުން މެޗުތަކެއް ކުޅެފައިވީ ނަމަވެސް އަންހެން މޮޅު ކުޅުންތެރިޔާގެ މަގާމު ހޮވާފައިނުވަނީ ގައުމީ ލެވަލްގައި އެކަށީގެންވާ ވަރަށް އަންހެން ފުޓްބޯޅަ މުބާރާތެއް ބާއްވާފައިނުވާތީ ކަމަށް އެނގިފައިވެ އެވެ.
އެކަމަކު، އަންހެން ފުޓްބޯޅަ ޓީމުން ވަނީ މާލޭގައި އެކުވެރިކަމުގެ މެޗުތަކެއްގައި ކުޅުމުގެ އިތުރުން ސެޕްޓެމްބަރު މަހު ނޭޕާލްގައި ބޭއްވި އަންހެން ސާފް ޗެމްޕިއަންޝިޕްގައި ކުޅެފަ އެވެ.
އެފްއޭއެމް އިން އެންމެ ފަހުން އަންހެން ފުޓްބޯޅަ މުބާރާތެއް ބާއްވާފައިވަނީ މިދިޔަ އަހަރު ނައިފަރުގައި ކުރިއަށްދިޔަ އެފްއޭއެމް ވިމެންސް އިންވިޓޭޝަނަލް ކަޕްގެ ޅ. އަތޮޅުގެ ބައެވެ. ވިމެންސް އިންވިޓޭޝަނަލް ކަޕްގެ އިތުރު ހަތަރު މުބާރާތެއް ލ އަތޮޅާއި ހދ. ކުޅުދުއްފުށި، ފުވައްމުލަށް އަދި މާލޭގައި ބާއްވަން ވެސް އޭރު ނިންމި އެވެ. އެކަމަކު، ފަހުން މި މުބާރާތް ކުރިއަށް ގޮސްފައިނުވެ އެވެ.
