އަރަބިއްޔާ ސްކޫލުގެ ދަރިވަރުން ސްކޫލަށް ދާއިރު މޫނު ބުރުގާ ނޭޅުމަށް އެންގި މައްސަލަ ހޫނުވެ، ބެލެނިވެރިންގެ ފަރާތުން އެ މައްސަލަ ކޯޓަށް ހުށަހަޅައިފި އެވެ.
ކުދިންގެ ހައްގުތަކަށް އަރައިގަތް ކަމަށް ބުނެ އެ މައްސަލަ މިއަދު ސިވިލް ކޯޓަށް ހުށަހަޅާފައިވާއިރު، އެ މައްސަލާގައި ބެލެނިވެރިން ތަމްސީލު ކުރަނީ ރެހެންދި ޗެމްބާސް ލޯ ފާމުންނެވެ. އެ ލޯ ފާމުން މިއަދު ނެރުނު ބަޔާނުގައި ބުނީ، ކޯޓަށް މައްސަލަ ހުށަހެޅީ ތައުލީމުގެ ގާނޫނާއި ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ އިތުރުން ރާއްޖެ ބައިވެރިވެ، ބަލައިގެންފައިވާ މުއާހަދާތަކުގެ ދަށުން ކަމަށެވެ.
މި މައްސަލާގައި ފައިސަލާ ކުރަނިވި ހުކުމެއް ކުރެވެންދެން މޫނު ބުރުގާ އަޅާ ކުދިންނަށް ސްކޫލަށް ހާޒިރު ނުވެވޭނެ ފަދަ އެއްވެސް ކަމެއް ނުކުރުމަށް ދައުލަތާއި، އެޑިއުކޭޝަން މިނިސްޓްރީ އަދި ސްކޫލުގެ މައްޗަށް ވަގުތީ އަމުރެއް ނެރެ ދިނުމަށް ވެސް ސިވިލް ކޯޓުގައި ވަނީ އެދިފަ އެވެ.
އެ ބަޔާނުގައި ބުނީ، އަރަބިއްޔާ ސްކޫލުގެ އަންހެން ދަރިވަރިންގެ ތެރެއިން މޫނު ބުރުގާ އަޅައިގެން މުޖުތަމައަށް ނިކުންނަށް ބޭނުންވާ ދަރިވަރުން މީގެ ކުރިން ސްކޫލަށް ދިޔައީ ސްކޫލުން ދީފައިވާ ހުއްދައެއްގެ ދަށުންނެވެ. ނަމަވެސް، މޫނު ބުރުގާ އަޅައިގެން ކުދިންނަށް ސްކޫލަށް ނުދެވޭނެ ކަމަށް އެޑިއުކޭޝަން މިނިސްޓްރީން ބެލެނިވެރިންނަށް އަންގާފައިވާ ކަމަށެވެ.
"ސްކޫލް ދަރިވަރުންގެ އާންމު ގަވާއިދާއި އަދި ސްކޫލްގެ ޔުނިފޯމް ކޯޑުގެ ތެރެއިން މިކުދިން ސްކޫލަށް ދިޔުމުގެ ހައްގުން މަހުރޫމް ކުރުވަމުންދާ މައްސަލަ، ފައިސަލާ ކުރިވަނިވި ހުކުމެއް ހޯދުމަށްޓަކައި މިއަދު ވަނީ ސިވިލް ކޯޓަށް ހުށަހަޅާފަ އެވެ." އެ ބަޔާނުގައި ބުނެ އެވެ.
އެ ބަޔާނުގައި އިތުރަށް ބުނީ، މޫނު ބުރުގާ އަޅާ ކުދިންނާމެދު ތަފާތުކޮށް ކަން ކުރާތީ، އެ ކުފިން ތައުލީމާ ދުރުވެ، ކިޔެވުމަށާއި ނަފްސާނީ ދުޅާހެޔޮ ކަމަށް ބުރޫ އަރަމުންދާ ކަމަށެވެ. އެހެންކަމުން އެކަމަށް ހައްލެއް ހޯދުމަށް ވެސް މައްސަލާގައި ވަނީ ހިމަނާފަ އެވެ.
