އދ. ގެ ސަލާމަތީ މަޖިލީހުގެ ރައީސްކަން ރަޝިއާއަށް ލިބުމުން ޔޫކްރެއިނުން ނުރުހުން ފާޅުކޮށްފި އެވެ.
ސަލާމަތީ މަޖިލީހުގައި ތިބެނީ 15 މެމްބަރު ގައުމެވެ. ކޮންމެ ގައުމަކުން ވެސް ދިމާވާ ތަރުތީބުން އެއް މަސް ވަންދެން ކައުންސުލްގެ ރިޔާސަތު ބަލަހައްޓަން ޖެހެ އެވެ.
އެންމެ ފަހުން ރަޝިއާއިން އެ ކައުންސިލްގެ ރިޔާސަތު ބެލެހެއްޓީ ފެބްރުއަރީ 2022 ގަ އެވެ. ޔޫކްރެއިނަށޤ ރަޝިއާ ސިފައިން އަރައި ހަނގުރާމަ ފެށީ ވެސް އޭރު އެވެ.
ރަޝިއާއަށް ސަލާމަތީ މަޖިލީހުގެ ރައީސްކަން ނުލިބޭނެ ގޮތް ހެދުމަށް ޔޫކްރެއިނުން ދިޔައީ މެމްބަރު ގައުމުތަކަށް ފިއްތުންތައް ކުރިމަތި ކުރުވަމުންނެވެ.
އެކަމަކު އެމެރިކާއިން ބުނީ އެއީ ކުރެވޭނެ ކަމެއް ނޫން ކަމަށެވެ. ރަޝިއާއަކީ ސަލާމަތީ މަޖިލީހުގެ ދާއިމީ މެމްބަަރެކެވެ. ދެން ހިމެނޭ ދާއިމީ މެމްބަރުންނަކީ އެމެރިކާ، އިނގިރޭސިވިލާތް، ފްރާންސް އަދި ޗައިނާ އެވެ.
ޔޫކްރެއިންގެ ފޮރިން މިނިސްޓަރު ޑިމީޓްރޯ ކުލެބާ ވިދާޅުވީ ބައިނަލްއަގްވާމީ ސެކިއުރިޓީއާ ގުޅޭ ކަންކަން ކުރިއަށް ދާ ގޮތުގައި ހުރި މައްސަލަތައް މިކަމުން ފާހަގަވާ ކަމަށެވެ.
މިދިޔަ އަހަރު ޔޫކްރެއިންގެ ރައީސް ވޮލޮޑިމިރް ޒެލެންސްކީ ގޮވާލެއްވީ ސަލާމަތީ މަޖިލިސް އަލުން އުފެއްދުމަށް ނުވަތަ އުވާލުމަށެވެ.
އދ. ގެ ސަލާމަތީ މަޖިލީހަކީ ބައިނަލްއަގްވާމީ ސުލްހަ ދެމެހެއްޓުމުގެ ޒިންމާ އަދާކުރާ ތަނެކެވެ. އެ މަޖިލީހުގެ ދާއިމީ ފަސް މެމްބަރުންނާ އެކު ވަގުތީ 10 މެމްބަރުން މަސައްކަތް ކުރެ އެވެ.
ދާއިމީ މެމްބަރުންނަށް ގަރާރުތައް ވީޓޯ ކުރުމުގެ ބާރު ލިބެ އެވެ. ގަރާރެއް ފާސްވާނީ ނުވަ މެމްބަރުންގެ ވޯޓު ލިބި، ދާއިމީ އެއްވެސް މެމްބަރަކު ދެކޮޅަށް ވޯޓު ނުދޭ ހާލަތުގަ އެވެ.
