ޓައިވާނުގެ ރައީސް ސާއީ އިންގް ވެން ނިއު ޔޯކަށް ވަޑައިގެންނެވުމާ އެކު އެމެރިކާއަށް ކުރިމަތިވާ ނަތީޖާ ހިތިވާނެ ކަމަށް ޗައިނާއިން އިންޒާރު ދީފި އެވެ.
ސާއީ ނިއު ޔޯކްގައި މަޑުކުރެއްވީ މެދުތެރޭ އެމެރިކާގެ ގައުމުތަކަށް ކުރައްވާ ދަތުރެއްގެ ތެރެއިން ޓްރާންސިޓް ކުރުމަށެވެ. އެހެން ނަމަވެސް، އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ކެވިން މެކްކާތީއާ ބައްދަލުކުރުން އެކަށީގެންވާ ކަމަށް ރިޕޯޓުތައް ބުނެ އެވެ.
އެފަދަ ބައްދަލުވުމެއް ބޭއްވުމަކީ ބަލައިގަނެވޭނެ ކަމެއް ނޫން ކަމަށް ޗައިނާއިން ބުނެފައިވެ އެވެ. ބައްދަލުވުމެއް ބާއްވައިފި ނަމަ ސީރިއަސް ހާލަތެއް ކުރިމަތިވާނެ ކަމުގެ އިންޒާރު ވެސް ޗައިނާއިން ދިނެވެ.
ރައްދުގައި އެމެރިކާއިން ބުނީ ޗައިނާއިން އުޅެނީ މާ ބޮޑުވަރު އަރުވާލައިގެން ކަމަށެވެ. އެގޮތުން ރައީސްކަމުގެ މަގާމުގައި ހުންނަވައި މީގެ ކުރިން ހަ ފަހަރަކު ސާއީ ޓްރާންސިޓް ކުރުމަށް އެމެރިކާގައި މަޑުކުރެއްވި ކަމަށް އެމެރިކާއިން ފާހަގަކުރި އެވެ.
"މިއީ ވަރަށް އާދައިގެ ކަމެއް... ޓައިވާނުގެ ކުރީގެ ރައީސުން ވެސް އެމެރިކާގައި ކުރު މުއްދަތަކަށް މަޑުކޮށް ޓްރާންސިޓްކޮށްފައިވޭ. މީގައި އާދަޔާ ހިލާފު އެއްވެސް ކަމެއް ނުވޭ،" އެމެރިކާއިން ބުންޏެވެ.
ސާއީ ނިއު ޔޯކަށް ވަޑައިގެންނެވުމުން ގިނަ އަދަދެއްގެ ސަޕޯޓަރުން ހޫނު މަރުހަބާއެއް ދެންނެވި އެވެ. އެކަމަނާ ދަތުރު ކުރެއްވުމަށް ހަމަޖެހިފައި ވަނީ ގުއާޓެމާލާ އާއި ބެލީޒޭއަށެވެ. އޭގެ ފަހުން ޓައިވާނަށް އެނބުރި ވަޑައިގެންނެވުމުގެ ކުރިން އެމެރިކާގެ ލޮސް އެންޖެލެސްގައި މަޑުކުރައްވާނެ އެވެ.
