ސަންޓިއާގޯ ޑެލް އެސްޓޭރޯ (29 މާޗު) - އެކުވެރިކަމު މެޗެއްގައި ރޭ ކުރަސާއޯ އަތުން 7-0 އިން އާޖެންޓީނާ އަމިއްލަ ދަނޑުގައި މޮޅުވިއިރު، މި މެޗުގައި ހެޓްރިކެއް ހެދި އާޖެންޓީނާގެ ކެޕްޓަން ލިއޮނެލް މެސީ ގައުމީ ޖޯޒީގައި 100 ލަނޑު ހަަމަކޮށްފި އެވެ.
ސަންޓިއާ ޑެލް އެސްޓޭރޯގައި ކެރޭބިއަންގެ ކުޑަ ގައުމެއް ކަމަށްވާ ކުރަސާއޯއާ ދެކޮޅަށް ދުނިޔޭގެ ޗެމްޕިއަން، އާޖެންޓީނާ ކުޅުނު މެޗުގެ 20 ވަނަ މިނިޓުގައި ލީޑު ނަގައިދިނީ މެސީ އެވެ. މިއީ އާޖެންޓީނާގެ ގައުމީ ޓީމަށް މެސީ ޖަހައިދިން 100 ވަނަ ލަނޑެވެ. ރޭގެ މެޗު ނިމުނުއިރު، މެސީ ގައުމީ ޓީމަށް ޖަހައިދިން ގޯލުގެ އަދަދު ވަނީ 102 އަށް އަރައިފަ އެވެ.
މި މެޗުގައި މެސީ ވަނީ އިތުރު ދެ ލަނޑު ޖަހައި، 36 މިނިޓް ތެރޭ ހެޓްރިކެއް ހަދައިފަ އެވެ. މިއީ ގައުމީ ޓީމުގައި މެސީ ހެދި ހަތް ވަނަ ހެޓްރިކެވެ. އަދި ކެރިއަރުގައި ހެދި 57 ވަނަ ހެޓްރިކް ވެސް މެ އެވެ. މެސީ މި މެޗުގައި ފުރަތަމަ ގޯލު ޖެހީ އޭރިއާތެރެއިން ކުރަސާއޯ ޑިފެންޑަރުން ކައިރިން ދެމި ގަތުމަށް ފަހު އެވެ. އޭގެ ފަހުން، އޭރިއާތެރެއިން ލިބުނު ފުރުސަތެއްގައި ގޯލުގެ ދުރު ކަނަށް ބޯޅަ ފޮނުވާލައިގެން ދެ ވަނަ ލަނޑުޖެހިއިރު، ހެޓްރިކް ފުރިހަމަކުރި ގޯލަކީ ކުރަސާއޯ ޑިފެންސް ފަހަތަށް އައި ބޯޅައެއް ހިފައިގެން އޭރިއާތެރެއަށް ވަދެ، ގޯލުގެ ކައިރީ ކަނަށް ޖެހި ގޯލެކެވެ.
އާޖެންޓީނާ އަށް މި މެޗުގައި ދެން ލަނޑު ޖަހައިދިނީ ނިކޮލަސް ގޮންޒާލޭޒް، އެންޒޯ ފެނާންޑޭޒް، އަންހެލް ޑިމާރިއާ އަދި ގޮންޒާލޯ މޮންޓިއެލް އެވެ.
މިއީ ގަތަރުގައި މިދިޔަ އޮތް ވޯލްޑް ކަޕް ކާމިޔާބުކުރި ފަހުން އާޖެންޓީނާ ކުޅުނު ދެ ވަނަ މެޗެވެ. ފުރަތަމަ މެޗުގައި ވަނީ ޕެނަމާ އަތުން ވަނީ 2-0 އިން މޮޅުވެފަ އެވެ.
