ޖާސޫސް ކުރުމުގެ ތުހުމަތުގައި ޗައިނާގައި ހައްޔަރު ކުރި ޖަޕާނުގެ ރައްޔިތަކު ދޫކޮށްލަަން ޖަޕާނުން ޑިމާންޑުކޮށްފި އެވެ.
މާޗް މަހުގެ ކުރީކޮޅު ހައްޔަރު ކުރި އުމުރުން 50 އަހަރުން މަތީގެ ފިރިހެން މީހާއަކީ ބޭސް އުފައްދާ ކުންފުނި އަަސްޓެއްލާޒްގެ މުވައްޒަފެކެވެ.
ކިޔޯޓޯ ނިއުސްއިން ބުނާ ގޮތުގައި 2015 ވަނަ އަހަރުން ފެށިގެން ޖާސޫސް ކުރުމުގެ ތުހުމަތުގައި ޗައިނާގައި ޖަޕާނުގެ 17 މީހުން ހައްޔަރުކޮށްފައިވެ އެވެ.
ތާރީހީ ގޮތުން ވެސް ޗައިނާ އާއި ޖަޕާނުގެ ގުޅުން ގޯހެވެ. ޓައިވާން މައްސަލަ އާއި އިރުމަތީ ޗައިނާ ކަނޑުގައިވާ ރަށްތަކެއްގެ މައްސަލައިގައި ވެސް ދެ ގައުމުގެ މެދުގައި ތަފާތުތައް ގިނަ އެވެ.
ހޯމަ ދުވަހު ޖަަޕާނުގެ ޗީފް ކެބިނެޓް ސެކެޓްރީ ހިރޮކަޒޫ މަޓްސޫނޯ ވިދާޅުވީ ޖަޕާނުގެ ރައްޔިތަކު ހައްޔަރުކޮށްފައިވާކަން ޗައިނާއިން ރަސްމީކޮށް އަންގާފައިވާ ކަމަށެވެ.
އެހެން ނަމަވެސް ހައްޔަރު ކުރި މީހާއާ ގުޅޭ އެއްވެސް ތަފްސީލެއް އަދި އޭނާގެ މައްޗަށް ޗައިނާއިން ކުރާ ތުހުމަތުގެ އެއްވެސް ތަފްސީލެއް ވެސް މަޓްސޫނޯ ހާމައެއްނުކުރެ އެވެ.
އެކަމަކު ޗަައިނާ ފޮރިން މިނިސްޓްރީގެ ތަރުޖަމާނު މާއޯ ނިންގް ވިދާޅުވީ އޭނާ ހައްޔަރު ކުރީ ޖާސޫސް ކުރުމުގެ ތުހުމަތުގައި ކަމަށެވެ.
މާއޯ ވިދާޅުވީ ޖަޕާނުގެ ރައްޔިތުން ގާނޫނާ ހިލާފު އަމަލުތައް ކުރުން ހުއްޓުވުމަށް ޖަޕާން ސަރުކާރުން އިތުރަށް މަސައްކަތް ކުރަން ޖެހޭ ކަމަށެވެ.
މީގެ ކުރިން 2019 ވަނަ އަހަރު ޖާސޫސް ކުރުމުގެ ތުހުމަތުގައި ޗައިނާއިން ހައްޔަރު ކުރި ޖަޕާނުގެ ޕްރޮފެސަރަކު ދެ މަސް ފަހުން ދޫކޮށްލި އެވެ.
