އެމްޑީޕީގެ ރިޔާސީ ޕްރައިމަރީ އަލުން ބާއްވައިދިނުމަށް އެދި ސިވިލް ކޯޓަށް ހުށަހެޅި މައްސަލައިގެ ޝަރީއަތް ލަސްވަމުންދާތީ، އެ މައްސަލަ ކޯޓަށް ހުށަހެޅި ފަރާތުގެ ގާނޫނީ ވަކީލެއްގެ ގޮތުގައި މަސައްކަތް ކުރައްވާ ކުރީގެ ބަންޑާރަ ނައިބު ދިޔާނާ ސައީދު ކަންބޮޑުވުން ފާޅުކުރައްވައިފި އެވެ.
އަލީ އަމްޖަދު ނަމަކަށް ކިޔާ މީހަކު ހުށަހެޅި އެ މައްސަލާގައި ވަގުތީ އަމުރަކަށް އެދިފައިވަނީ ރައީސް އިބްރާހީމް މުހައްމަދު ސޯލިހު ކާމިޔާބު ކުރެއްވި ކަމަށް ދައްކާ ނަތީޖާއަށް އަމަލުކުރުން ފަސްކުރަން އެމްޑީޕީގެ މައްޗަށް އަމުރުކޮށްދިނުމަށެވެ.
ނަމަވެސް, އެ މައްސަލައަކީ ސިވިލް ކޯޓުގެ އިހުތިސޯސްގެ ތެރޭގައި ހިމެނޭ މައްސަލައެއް ނޫން ކަމަށް އެމްޑީޕީން ބުނެ އެވެ. އެމްޑީޕީން އެ ގޮތަށް ނުކުތާއެއް ހުށަހަޅާފައިވާތީ، ޕްރައިމަރީއަށް އަމަލުކުރުން ފަސްކުރުމުގެ ވަގުތީ އަމުރުގެ ކުރިއަށް، އިހުތިސޯސްގެ ބަހުސް ކުރިއަށް ގެންދަން ކޯޓުން ނިންމާފައިވެ އެވެ.
މިއަދުގެ އަޑުއެހުމަށް އެމްޑީޕީގެ ފަރާތުން އެއް ވަކީލަކަށް ހާޒިރުނުވެވޭތީ އެހެން ދުވަހަކަށް ފަސްކޮށްދިނުމަށް އެދިފައިވެ އެވެ. އެކަމާ މެދު މައްސަލަ ހުށަހެޅި ފަރާތުން އިއުތިރާޒު ނުކުރާތީ މާދަމާ ހެނދުނު 11:30 އަށް އަޑުއެހުމެއް ބާއްވާ ގޮތަށް މިއަދު އަޑުއެހުން ކުރިއަށް ނުގެންގޮސް ނިންމާލި އެވެ.
ދިޔާނާ ކުރެއްވި ޓްވީޓެއްގައި ވިދާޅުވީ އެމްޑީޕީގެ ވަކީލުންނަށް ގެއްލުންވާ ގޮތަށް އަޑުއެހުން ގެންދިޔައީ ކަމަށް ބުނުމުގެ ފުރުސަތު ދޭން ބޭނުން ނުވާ ކަމަށެވެ. އަދި, އެމްޑީޕީގެ މުޅި ލީގަލް ޓީމާ ދެކޮޅަށް އެ މައްސަލާގައި ވަކާލާތު ކުރުމަށް ތައްޔާރަށް ތިބި ކަމަށް ވެސް ދިޔާނާ ވިދާޅުވި އެވެ.
"މި ގޮތަށް ކަން ހިނގައި ދިޔަ އިރު ޝަރީއަތް ލަސްވެގެންދާ ދިއުމާ މެދު ކަންބޮޑުވުން އެބަ ހުރި،" ދިޔާނާ ކުރެއްވި ޓްވީޓްގައި ލިޔުއްވާފައިވެ އެވެ.
މައްސަލައިގެ ފަސްފަހަތް؛
އެމްޑީޕީގެ ރިޔާސީ ޕްރައިމަރީ ރައީސް އިބްރާހީމް މުހައްމަދު ސޯލިހު ކާމިޔާބުކުރެއްވީ ވޯޓުލީ މީހުންގެ 61 އިންސައްތަ އެވެ. ދެން އެ އިންތިހާބުގައި ވާދަކުރެއްވި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ލިބިވަޑައިގަތީ 39 އިންސައްތަ އެވެ.
ރައީސް ސޯލިހަށް ތާއީދުކުރައްވަން ނަޝީދު އަދި ނުނިންމަވަ އެވެ. އޭގެ ބަދަލުގައި އެމަނިކުފާނު ގެންދަވަނީ "ފިކުރެއްގެ ދިރުން" ނަމުގައި ގޮފިތަކެއް އުފައްދައި، އެ ގޮފިތަކަށް 50،000 މީހުން ވެއްދުމަށެވެ. އަދި ތާއީދުކުރާނެ ކެންޑިޑޭޓެއް ފަހުން ކަނޑައެޅޭނެ ކަމަށް ނަޝީދު ވިދާޅުވެފައިވެ އެވެ.
އެމްޑީޕީގެ ޕްރައިމަރީ އަލުން ބާއްވައިދޭން ކޯޓަށް މައްސަލައެއް ހުށަހަޅާފައިވާއިރު، ނަޝީދުގެ "ފިކުރެއްގެ ދިރުން" ފެކްޝަން މިހާރު މަސައްކަތް ކުރަމުން ގެންދަނީ ރިޔާސީ އިންތިހާބުގައި ވާދަކުރުމަށް ނިންމާފައިވާ ޖުމްހޫރީ ޕާޓީއާ އެކުގަ އެވެ. ޖޭޕީއާއެކު މެނިފެސްޓޯއެއް ހެދުމުގެ މަސައްކަތް ވެސް ފަށާފައިވެ އެވެ.
އެމްޑީޕީގެ ލީޑާޝިޕަށް އައި ބަދަލު؛
2008، 2013 އަދި 2018 ގައި ވެސް އެމްޑީޕީގެ ޕްރައިމަރީން ރިޔާސީ ކެންޑިޑޭޓް ގޮތުގައި ނިންމީ ނަޝީދެވެ. ނަމަވެސް 2018 ވަނަ އަހަރު، ނަޝީދަށް އިއްވާފައިވާ ޖަލު ހުކުމުގެ ސަބަބުން ވާދަނުކުރެވޭނެތީ، ރައީސް ސޯލިހަށް ޓިކެޓު ދިނުމަށް އެމްޑީޕީގެ ކޮންގްރެސް މެދުވެރިކޮށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން، އެމްޑީޕީގެ އެތެރޭގައި ދެ ފެކްޝަނެއް ވަނީ އުފެދިފަ އެވެ. އޭގެ ފަހުން އެ ޕާޓީގެ އެތެރޭގައި ބޭއްވި ކޮންމެ އިންތިހާބެއް ވެސް، ނަޝީދުގެ ފެކްޝަންގެ މައްޗަށް ސޯލިހުގެ ފެކްޝަން ކުރި ހޯދާފައިވެ އެވެ.
އެމްޑީޕީގެ ޗެއާޕާސަން އިންތިހާބު ކާމިޔާބުކޮށް، ޕާޓީގެ އެންމެ ބާރުގަދަ އެއް މަގާމުގައި ހުންނެވީ ވެސް ރައީސްގެ އެންމެ އެއް އަރިސް ވަޒީރު، އިކޮނޮމިކް މިނިސްޓަރު ފައްޔާޒު އިސްމާއީލެވެ. އަދި އެމްޑީޕީގެ އެންމެ އިސް ގުނަން ކަމަށްވާ އެ ޕާޓީގެ ގައުމީ މަޖިލީހުގެ އިންތިހާބުތަކަށް ފަހު އެ މަޖިލީހުގެ މެޖޯރިޓީ ވެސް އޮތީ ރައީސް ސޯލިހަށެވެ. އަދި ޕާލިމެންޓްރީ ގްރޫޕްގެ މެޖޯރިޓީ ވެސް އޮތީ ރައީސަށެވެ.
