މީހެއްގެ ކަރުގައި ހިފައި ހަމަލާދީ، ފުރައްސާރަ ކުރި ކަމަށް ބެލެވޭ މައްސަލައެއްގައި "ކްރީޑް 3" ގެ އެކްޓަރު ޖޮނަތަން މޭޖާޒް ހައްޔަރުކޮށްފި އެވެ.
ނިއު ޔޯކް ފުލުހުން ބުނީ ހޮނިހިރު ދުވަހު އުމުރުން 30 އަހަރުގެ އަންހެނަކަށް އަނިޔާކުރި ކަމުގެ ތުހުމަތުގައި ޖޮނަތަން މޭޖާޒް ހައްޔަރުކުރި ކަމަށެވެ.
ޖޮނަތަން މޭޖާޒް އާއި މައިކަލް ބީ ޖޯޑަން ފެނިގެންދާ "ކްރީޑް 3" ނެރުނީ މި މަހު އެވެ. އޭނާއާ ދެކޮޅަށް ފުލުހަށް މައްސަލަ ހުށަހެޅީ އަނިޔާ ލިބުނު އަންހެން މީހާ އެވެ.
ޖޮނަތަން މޭޖާޒްގެ ވަކީލު ބުނީ ހައްޔަރު ކުރުމަށް ފަހު މިހާރު އޭނާ ދޫކޮށްލާފައިވާ ކަމަށެވެ. އުމުރުން 33 އަހަރުގެ އެކްޓަރު ވަނީ ތުހުމަތުތައް ދޮގުކޮށްފަ އެވެ.
ފުލުހުން ބުނީ މައްސަލަ ރިޕޯޓު ކުރި އަންހެން މީހާގެ ބޮލާއި ކަނދުރާއަށް ކުދި ޒަހަމްތައް ލިބިގެން ހޮސްޕިޓަލުގައި ފަރުވާ ދޭން ޖެހުނު ކަމަށެވެ.
މި މަހު އޮތް އޮސްކާ އެވޯޑް ހަފުލާގައި ޖޮނަތަން މޭޖާޒް ވަނީ ބައިވެރިވެފަ އެވެ. އޭނާގެ އެކްޓިން ކެރިއަރުގައި ކުރިއަރަން ފެށީ 2019 ވަނަ އަހަރު ނެރުނު "ދަ ލާސްޓް ބްލެކް މޭން އިން ސޭން ފްރެންސިސްކޯ" އަށް ފަހު އެވެ.
އޭގެ ފަހުން ނެޓްފްލިކްސްގެ "ދަ ހާޑާ ދޭ ފޯލް" އާއި މާވެލް ކޮމިކްސްގެ ފިލްމު "އޭންޓް މޭން އެންޑް ދަ ވޯސްޕް: ކުއެންޓުމޭނިއާ" އިން ވެސް އޭނާ ފެނުނެވެ.
