ޖުޑީޝަލް ސާވިސް ކޮމިޝަން (ޖޭއެސްސީ) އަށް މިދިޔަ އަހަރު ފަނޑިޔާރުންނާ ގުޅޭ ގޮތުން ހުށަހެޅި ޝަކުވާތަކުގެ ތެރެއިން މަދު މައްސަލައެއް ބަލަން ކޮމިޝަނުން ނިންމަން ޖެހުނީ، ފަނޑިޔާރުންގެ ސުލޫކަށް ހެޔޮ ބަދަލުތަކެއް އައުމާ ގުޅިގެން ކަމަށް އެ ކޮމިޝަންގެ ރައީސް ހިސާން ހުސައިން ވިދާޅުވެއްޖެ އެވެ.
ޖޭއެސްސީން މިއަދު އާންމުކުރި އެ ކޮމިޝަނުގެ މިދިޔަ އަހަރުގެ އަހަރީ ރިޕޯޓު ދައްކާ ގޮތުން، މިދިޔަ އަހަރު އެ ކޮމިޝަނަށް ފަނޑިޔާރުންނާ ގުޅޭ ގޮތުން ސުލޫކީ މައްސަލައެއް ބެލުމަށް އެދި 392 ޝަކުވާއެއް ހުށަހަޅާފައިވެ އެވެ. ނަމަވެސް ކޮމިޝަނުން ބަލަން ނިންމީ، އޭގެ ތެރެއިން އެންމެ 15 ޝަކުވާ އެވެ.
އަހަރީ ރިޕޯޓުގައި ހިމަނާފައިވާ ހިސާންގެ ލިޔުމުގައިވާ ގޮތުން، އޭނާ ދެކެވަޑައިގަންނަވާ ގޮތުގައި ބަލަން ނިންމި މައްސަލައިގެ ނިސްބަތް މަދުވުމަކީ ފަނޑިޔާރުންގެ ސުލޫކަށް ހެޔޮ ބަދަލުތަކެއް އައިސްފައިވާ ކަމުގެ ހެއްކެއް ކަމުގަ އެވެ.
"2022 ވަނަ އަހަރު ބަލަން ނިންމުނު މައްސަލަތަކުގެ އިންސައްތަ ދަށްވުމީ، ފަނޑިޔާރުންގެ ސުލޫކަށް ހެޔޮ ބަދަލުތަކެއް އައިސްފައިވާ ކަމުގެ ހެއްކެކެވެ،" ހިސާންގެ ލިޔުއްވުމުގައިވެ އެވެ.
އޭގެ އިތުރަށް، ހުށަހެޅިފައިވާ ޝަކުވާއަކާ ގުޅިގެން ޝަރުއީ ނިޒާމުގެ ތެރެއިން އަދި ފަނޑިޔާރު ހަވާލުވެފައިވާ ޝަރީއަތް މެދުވެރިކޮށް ރަނގަޅު ކުރެވެން ހުރި ކަންކަމުގައި، ކޮމިޝަނުން މައްސަލަ ބެލުމުގެ ބަދަލުގައި ޝަރީއަތް މެދުވެރިކޮށް ރަނގަޅު ކުރުމަށް ބާރު އަޅުވާފައިވާނެ ކަމަށް ވެސް ހިސާން ވިދާޅުވެފައިވެ އެވެ.
މިދިޔަ އަހަރު ކޮމިޝަންގެ 74 ބައްދަލުވުމެއް ބާއްވައި 512 ނިންމުމެއް ނިންމިކަން ހިސާން ފާހަގަ ކުރެއްވި އެވެ. އެ ތަފާސްހިސާބުތަކަށް ހަވާލާދީ، ހިސާން ސިފަކުރެއްވީ މިދިޔަ އަހަރަކީ ޖޭއެސްސީން ބުރަ މަސައްކަތްތަކެއް ކުރެވިފައިވާ އަހަރެއްގެ ގޮތުގަ އެވެ.
