އިރުމަތީ ޔޫކްރެއިންގައި ރަޝިއާ ސިފައިން ފަހަތަށް ޖައްސަން މަސައްކަތް ފެށޭނީ އިތުރު ހަތިޔާރު ލިބިގެން ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ޖަޕާނުގެ ޔޮމިއުރީ ޝިމްބުން ނޫހަށް ދެއްވި އިންޓަވިއުގައި ޒެލެންސްކީ ވިދާޅުވީ އިތުރު ޓޭންކާރި، އާޓިލެރީ އަދި ހިމާސް ރޮކެޓް ލޯންޗަރު ނުލިބެނީސް ސިފައިން ނުފޮނުވާނެ ކަމަށެވެ.
އިރުމަތީ ޔޫކްރެއިންގެ ހާލަތު ރަނގަޅު ނޫން ކަމަށާއި ޔޫކްރެއިނުން އިންތިޒާރު ކުރަމުން ދަނީ ބައިވެރިންގެ ފަރާތުން ހަތިޔާރު ލިބޭނެ ވަގުތަކަށް ކަމަށް ޒެލެންސްކީ ވިދާޅުވި އެވެ.
"ސިޔާސީ ގޮތުން މިކަން ކުރަން ބޭނުންވާ ނަމަ، އަޅުގަނޑުމެންނަށް އެހީވެވޭނެ ގޮތެއް ވެސް ހޯދޭނެ. އަޅުގަނޑުމެން މި އުޅެނީ ހަނގުރާމައެއްގައި، އެހެންވީމަ މަޑުކުރެވޭކަށް ނެތް."
އިރުމަތީ ޔޫކްރެއިންގައި ރަޝިއާ ސިފައިން ފަހަތަށް ޖައްސަން ބޮޑު އޮޕަރޭޝަނެއް ފަށަން އުޅޭ ކަމަށް ރިޕޯޓުތައް ފެތުރޭތާ ގިނަ ދުވަސްތަކެއް ވެއްޖެ އެވެ.
ޔޫކްރެއިނަށް ބޭނުންވާ އިތުރު ހަތިޔާރު ފޯރުކޮށްދޭން ހުޅަނގުގެ ގައުމުތަކުން ވައުދުވެފައިވި ނަމަވެސް، އެ ވައުދު ފުއްދުމަކީ ގައުމުތަކަށް ގޮންޖެހުމެކެވެ.
އެ ތަކެތި ފޮނުވަން ބޭނުންވާ ރޭވުންތަކާއި ތަމްރީންތަކަށް ވަގުތު ހޭދަވާ ކަމަށް ހުޅަނގުގެ އޮފިޝަލުން ބުނާ އިރު، ޒެލެންސްކީ މީގެ ކުރިން ވެސް ވަނީ އެކަމާ މެދު ހިތްހަމަނުޖެހުން ފާޅުކުރައްވައިފަ އެވެ.
