ދުނިޔޭގެ އެކި ކަންކޮޅުތަކުގައި މުސްލިމުން ރަމަޟާން މަހަށް މަރުހަބާ ކިޔާ އެ މަހަށް ތައްޔާރުވާން ތަފާތު ކަންތައްތައް ކޮށްއުޅެ އެވެ. މި ގޮތުން ކޮށްއުޅޭ ކަންތައްތައް ޒަމާނާއެކު ބަދަލުވަމުން އާދެއެވެ. އަނެއް ބައި ކަންތައް އެއްކޮށް ދޫކޮށްލައެވެ. އަދި އާކަންތައްތައް ފެށެމުންވެސް އާދެއެވެ. ބައެއްގެ ތެރޭގައި މިހެން ކޮށްއުޅުނު ކޮންމެކަމަކީވެސް އާދަކާދައިގެ ތެރެއަށް ވަންނަކަންތައްތަކެވެ.
ދިވެހިރާއްޖޭގައި ވެސް އަންޒަމާނުން އެހެން އެއްވެސް މަހަކަށް ތައްޔާރުނުވާ ވަރަށް ރަމަޟާން މަހަށް ތައްޔާރުވުން އޮވެ އެވެ. މިގޮތުން މިމަހަށް ތައްޔާރުވާން ކޮށްއުޅުނު ގިނަ ކަންތައްތަކަށް ބެލުމެއް ނެތި, ރޯދަ ހިފުމަށްވާ އެންމެ ފަހުގެ ތައްޔާރު ކަމުގައިވާ ދުއްރައިން ތެޅުމަށް ބަލައިލާނަމެވެ. ކުރީގައި ދެންނެވި ފަދައިން މިއީ ދިވެހިން ރޯދައަށް ތައްޔާރުވުމުގެ ގޮތުން ކޮށްއުޅުނު ކަންތައްތަކުގެ ތެރެއިން މިކަން ކޮށްފައި ނޫނީ ރޯދަ ނުހިފޭ ވަރުގެ ކަމެކެވެ. އެހެން ކަމުން ރޯދަ ހިފާ އުމުރުގެ ހަމަ އެކަކުވެސް މިކަމަކުން އިސްތިސްނާއެއް ނުވާނެއެވެ.
ރޯދައަށް ދުއްރައިން ތެޅުމަކީ އަހަރު ތެރޭގައި އެމީހަކަށް އެނގިގެންނާއި ނޭނގި ކުރެވިފައި ހުރި، ކުށްތަކުގެ ކައްފާރާއެއްގެ ގޮތުން ކޮށްއުޅުނު ތައުޒީރެކެވެ. މި ތެޅުން ތެޅިގެން ނޫނީ ރަމަޟާން މަހު ރޯދަ ނުހިފޭކަމުން ރަމަޟާން މަސް ކައިރި ވަމުން އަންނަވަރަކަށް ނައިބުގޭ ދޮށަށް ރައްޔިތުން ގޮސް ދުއްރައިން ތެޅި ރޯދަ ހިފުމަށް ތައްޔާރުވެ އެވެ. މި ތެޅުން ތަޅާނީ ފަސްފަހަރު އެވެ. މާބާރަކަށް ނޫނެވެ.
ދުއްރައިން ނުތެޅި ތިބި މީހުންގެ ތެރެއިން މަހަށް ފަރަށް ދާ މީހުންވެސް ކޮންމެ ގޮތަކުންވެސް އެރެއަށް ރަށަށް އަންނަން ޖެހޭނެ އެވެ. ވައިވަރު ނުވަތަ މޫސުން ގޯސްވުމުގެ ސަބަބުން ރަށަށް އައުން ލަސްވިޔަސް، ފަނޑިޔާރުގެއިން ފޮނުވާ ދޭވާނީ އަތިރިމަތީގައި އެ މީހުންގެ ހަބަރު ބެލުމަށް މަޑުކުރެއެވެ. އެއީ އެއިން އޮޑިއެއްގައި ރޯދަޔަށް ނުތަޅާ މީހަކު ފަހަރެއްގައި ހުރެދާނެތީ އެވެ. ނުތަޅާ ހުރި މީހަކު ރަށު ގޮނޑުދޮށަށް ފޭބުމުން ދުއްރައިން ތަޅާފައި ނޫނީ ދޭވާނީއަކަށް ގެއަކަށް ނުދެވޭނެ އެވެ. ކޮންމެ ގޮތަކުން ވިޔަސް ނުތެޅި މީހަކު ހުރި ނަމަ އެ މީހަކަށް ރޯދައެއް ނުހިފޭނެ އެވެ.
މި ތެޅުން ތެޅުމުގައި ދޭވާނީ ކިޔާ އުޅެނީ, އައްމާނަހާ ހުﷲ، ރަޖުޢަތުﷲ، އަސްތަޣުފިރުﷲ އަދި މީގެ އިތުރުން ޝަހާދަތުގެ ދެކަލިމަވެސް ކިޔައި އުޅުނު ކަމުގައި ވެއެވެ. މިވާހަކަ އަޅުގަނޑަށް ކިޔައި ދެއްވީ, ކަނޑިތީމު ޔޫސުފް ޙަސަން, ނަސީމީގެ އެވެ.
މިފަދަ ބޯދާ ކަންކަމުން އަޅުގަނޑުމެންގެ ކާބަފައިން ދިރިއުޅުމާއި އޭރު އެބައިމީހުންގެ ހާލަތު ހުރި ނެތް ގޮތް އެނގިގެން ދެ އެވެ. މިއަދު ހެޔޮ ނިޔަތުގައި ކުރަމުންދާ ކިތަންމެ ކަމެއް މާދަމާ ހުއްޓާލާ ދޫކޮށްލަން ޖެހުމަކީ އަޅުގަނޑުމެން ހައިރާންވާ ޖެހޭވަރުގެ ކަންކަމެއް ނޫނެވެ. މިހާރުވެސް ހިނގަމުން އަންނަ ކަންކަމެވެ.
