ދެކުނު ކޮރެއާ އާއި ދިވެހިރާއްޖެއާ ދެމެދު ސީދާ ވައިގެ ދަތުރުފަތުރު ފަށަން މިއަދު މަޝްވަރާކޮށްފި އެވެ.
އެ މަޝްވަރާތައް ކުރިއަށް ގެންދިޔައީ ރައީސުލްޖުމްހޫރިއްޔާގެ ނައިބު ފައިސަލް ނަސީމުގެ އަރިހަށް ކޮރެއާ ރައީސްގެ ހާއްސަ މަންދޫބެއްގެ ހައިސިއްޔަތުން، ސީނިއާ ސެކްރެޓަރީ ޓު ދަ ޕްރެސިޑެންޓް ފޯ ޕޮލިޓިކަލް އެފެއާޒް، ލީ ޖިން ބޮކް ވަޑައިގެން ދެއްކެވި ވާހަކަތަކުގެ ތެރެއިންނެވެ.
އޭގެ އިތުރުން، ތައުލީމާއި ފަތުރުވެރިކަމާއި ވިޔަފާރީގެ ދާއިރާ އާއި އިންވެސްޓްމަންޓްގެ ދާއިރާއިން ގުޅުން ބަދަހިކުރުމަށް ވެސް އެ ދެ ބޭފުޅުން މަޝްވަރާ ކުރެއްވި އެވެ. އަދި މޫސުމަށް އަންނަ ބަދަލުތަކާ ގުޅޭ ގޮތުން ގުޅުން ބަދަހިކުރުމަށް ވެސް ވާހަކަ ދެއްކެވި އެވެ.
އެ ބައްދަލުވުމުގައި، ރާއްޖޭގެ ސިއްހީ ދާއިރާގެ އިންސާނީ ވަސީލަތްތައް ތަރައްގީ ކުރުމަށް ވެސް މަޝްވަރާ ކުރެއްވި އެވެ.
ކޮރެއާ އާއި ދިވެހިރާއްޖެއާ ދެމެދު ސިޔާސީ ގުޅުން ގާއިމް ކުރީ ނޮވެމްބަރު، 1966، ގަ އެވެ.
