ރަޝިއާގެ ރައީސް ލެޑިމިއަ ޕުޓިން އަދި ރަޝިއާގެ ކޮމިޝަނާ ފޯ ޗިލްޑްރެންސް ރައިޓްސް ހައްޔަރު ކުރުމުގެ އަމުރެއް ބައިނަލްއަގްވާމީ ކްރިމިނަލް ކޯޓް (އައިސީސީ) އިން ނެރެފި އެވެ.
އައިސީސީއިން ނެރުނު ބަޔާނެއްގައި ބުނީ ގާނޫނާ ހިލާފަށް ކުޑަކުދިން ޔޫކްރެއިނުން ރަޝިއާއަށް ޑީޕޯޓްކުރުމުގެ ތުހުމަތު އެ މީހުންނަށް ކުރެވޭ ކަމަށެވެ. އަދި އެއީ ހަނގުރާމައިގެ ޖަރީމާއެއް ކަމަށް ބުންޏެވެ.
ކުދިން ޑީޕޯޓްކުރުމުގައި ޖިނާއީ ގޮތުން ސީދާ ޕުޓިން ޒިންމާވާން ޖެހޭނެ ކަމަށް ބެލެވޭނެ ސަބަބުތައް އެބަހުރި ކަމަށް ވެސް ބަޔާނުގައި ބުންޏެވެ.
ޕުޓިންގެ އިތުރުން ރަޝިއާގެ ކޮމިޝަނާ ފޯ ޗިލްޑްރެންސް ރައިޓްސް މާރިއާ ލްވޯވާ ބެލޯވާގެ ނަން ބަޔާނުގައި ފާހަގަކުރި އެވެ.
މިދިޔަ އަހަރުގެ ފެބްރުއަރީ މަހު ޔޫކްރެއިންގައި ހަނގުރާމަ ފެށި ފަހުން އެ ގައުމުގެ 16،000 އަށް ވުރެ ގިނަ ކުދިން ރަޝިއާގެ އެކި ހިސާބުތަކަށް ގެންގޮސްފައިވާ ކަމަށް ޔޫކްރެއިނުން ތުހުމަތު ކުރެ އެވެ.
އެ މައްސަލަ ބަލާ އދ. ގެ ކޮމިޝަނަކުން ކުރި ތަހުގީގަށް ފަހު ބުނީ ޔޫކްރެއިންގެ އެތައް ސަތޭކަ ކުދިން ޑީޕޯޓްކުރި ކަމަށް ބެލެވޭ ހެކި އެބަ ހުރި ކަމަށެވެ.
އެހެން ނަމަވެސް ރަޝިއާއިން އެ ތުހުމަތު ދޮގުކުރެ އެވެ. އޭގެ އިތުރުން އައިސީސީއަކީ އެއްވެސް ގާނޫނީ ހައިސިއްޔަތެއް ނެތް ތަނެއްގެ ގޮތުގައި ރަޝިއާއިން ސިފަކުރެ އެވެ.
ހައްޔަރު ކުރުމުގެ އަމުރު ނެރުނު ނަމަވެސް، ތުހުމަތު ކުރެވޭ މީހުން ހައްޔަރު ކުރުމުގެ ބާރެއް އައިސީސީއަކަށް ނޯވެ އެވެ.
އެ ކޯޓުގެ ބާރު ހިނގާނީ ހަމައެކަނި ރޯމް ސްޓްޗޫޓް އެއްބަސްވުމުގައި ސޮއިކޮށްފައިވާ ގައުމުތަކުގައި އެކަންޏެވެ. ރަޝިއާއިން އެ އެއްބަސްވުމުގައި ސޮއިކޮށްފައެއް ނުވެ އެވެ.
