ކުޅިވަރު ތަރިންގެ އަގުވަޒަންކުރުމަށް އެވޯޑެއް ދިނުން މުހިންމު ކަމަށާއި ރާއްޖޭގެ ފުޓްބޯޅަ އަށް ވެސް މަަސައްކަތް ކުރާނަމަ ކުރިއެރުން ހޯދޭނެ ކަމަށް މޯލްޑިވްސް ސްޕޯޓްސް އެވޯޑްސްގެ މެހެމާނެއްގެ ގޮތުގައި ރާއްޖެ އައި އިޓަލީ ގައުމީ ޓީމުގެ ކުރީގެ ކެޕްޓަން، ފަބިއޯ ކަނަވާރޯ ބުނެފި އެވެ.
އިޓަލީ އަށް 2006 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ކެޕްޓަން، ކަނަވާރޯ، 49، އަށް މިދިޔަ އަހަރު ވެސް މޯލްޑިވްސް ސްޕޯޓްސް އެވޯޑްސްގައި ބައިވެރިވުމުގެ ދައުވަތު ލިބުނެވެ. އެކަމަކު، އޭރު ކަންތައްތައް ހުރި ގޮތުން ބައިވެރިނުވެވުނު ނަމަވެސް، މި ފަހަރުގެ އެވޯޑް ހަފްލާގެ ދައުވަތު، ޔޫތު މިނިސްޓަރު އަހުމަދު މަހުލޫފްގެ ފަރާތުން ލިބުމާ އެކު، އެ ގަބޫލުކުރަން ނިންމީ ކަމަށް ކަނަވާރޯ ވަނީ ބުނެފަ އެވެ.
ކަނަވާރޯ، އިއްޔެ ވަނީ ސްޕޯޓްސް އެވޯޑްސްގައި ބައިވެރިވުމަށް އާއިލާއާ އެކު ރާއްޖެ އަތުވެފަ އެެެވެ.
"މިއީ އަހަރެން ރާއްޖެ އައި ފުރަތަމަ ފަހަރު، މި ކަހަލަ ދައުވަތެއްގައި ފުރަތަމަ އާދެވުނީތީވެސް ހިތްހަމަޖެހޭ. (މޯލްޑިވްސް ސްޕޯޓްސް އެވޯޑްސް) އަކީ ވަރަށް މުހިންމު އިވެންޓެއް، މި ފަދަ އިވެންޓެއްގައި ބައިވެރިވުމަކީ ފުރުސަތު ލިބުމުން މިހުރީ ކެތްމަދުވެފައި،" 2006 ވަނަ އަހަރު ފީފާ އިން ހޮވި އެންމެ މޮޅު ފުޓްބޯޅަ ކުޅުންތެރިޔާގެ މަގާމާއި ފްރާންސް ފުޓްބޯލް އިން ދިން ބެލޮންޑިއޯ އެވޯޑް ހޯދި، ކަނަވާރޯ، ޕީއެސްއެމް އަށް ދިން އިންޓަވިއުއެއްގައި ބުންޏެވެ.
ރާއްޖޭގެ ގައުމީ ފުޓްބޯޅަ ޓީމުގެ ކޯޗަކަށް ހުރި އިޓަލީ ގައުމީ ޓީމުގެ ކުރީގެ ކުޅުންތެރިޔާ، ފްރެންޗެސްކޯ މޮރިއޭރޯ އަކީ ގާތް އެކުވެރިއެއް ކަމަށާއި އޭޝިއާ ފުޓްބޯޅައިގެ ކަންކަން ވަރަށް ރަނގަޅަށް އެނގޭ ކަމަށް ކަނަވާރޯ ވަނީ ބުނެފަ އެވެ.
"އަހަންނަށް އޭޝިއާ ފުޓްބޯޅަ އެނގޭ. އަހަރެން ޗައިނާގައި އުޅުނިން (ކުޅުންތެރިއެއް އަދި ކޯޗެއްގެ ގޮތުގައި). އޭޝިއާ ފުޓްބޯޅައިގައި ވެސް ކޮންމެ ބަޔަކު ވެސް ބޭނުންވަނީ ކުރިއެރުން ހޯދަން ވަރަށް އަވަހަށް އެކަން ހާސިލްކުރަން މި ކުރަނީ މަސައްކަތް، ރާއްޖެ އަށް ވެސް އޮތީ ކުރިއަރަން ބޭނުންނަމަ މަސައްކަތް ކުރުން، ފިޔަވަޅަކަށް ފަހު ފިޔަވަޅެއް ކުރިއަށް ދަމުން ވެސް އެއްޗެއް ހާސިލްކުރެވިދާނެ،" ޗައިނާ ސުޕަ ލީގުގައި ކުޅުމުގެ އިތުރުން ޗައިނާ ގައުމީ ޓީމުގެ ކޯޗަކަށް ވެސް ހުރި ކަނަވާރޯ ބުންޏެވެ.
"އެންމެން ވެސް މި މަސައްކަތް ކުރަނީ ޔޫރަޕްގެ ފުޓްބޯޅަ ބަލައިގެން ކުރިއެރުން ހޯދަން،"
ކަނަވާރޯގެ އިތުރުން ސްޕޯޓްސް އެވޯޑްސް އަށް އަންނަ މެހެމާނުންނަށް ބަލާއިރު، އޮޮލިމްޕިކް އިން މެޑަލް ހޯދާފައިވާ ފެތުންތެރިޔާ، ޕަނީއަލް ބްލޫމް، ކޮމަންވެލްތު ގޭމްސް އާއި އިސްލާމިކް ސޮލިޑާރިޓީ ގޭމްސްގައި ރަން މެޑަލް ހޯދާފައިވާ ޖެވެލިން އުކުންތެރިޔާ، ޕާކިސްތާންގެ އަރުޝަދު ނަދީމް އަދި ނައިޖީރިއާގެ ސްޕޯޓްސް މިނިސްޓަރު ސަންޑޭ އަކިންޑާރޭ ބައިވެރިވެވަޑައިގަންނަވާނެ އެވެ.
އޭގެ އިތުރުން އެވޯޑަށް ދެން އަންނަ މެހެމާނުންނަށް ބަލާއިރު، ލިވަޕޫލާއި ވެސްޓް ހޭމް ޔުނައިޓެޑްގެ އިތުރުން މެންޗެސްޓާ ސިޓީ އަށް ވެސް ކުޅުނު އިނގިރޭސި ގައުމީ ޓީމުގެ ކުރީގެ ގޯލްކީޕަރު ޑޭވިޑް ޖޭމްސް، މަޝްހޫރު ކްލަބްތަކުން ފެނުނު ނައިޖީރިއާގެ ފޯވާޑް ންވަކްވޯ ކާނޫ އާއި ކްރިކެޓްގެ ތާރީހީ ރެކޯޑްތަކެއް ހޯލްޑް ކުރާ ބެޓްސްމަން، ބްރަޔާން ލާރާގެ އިތުރުން ސްޕެޝަލް އެތުލީޓް، މާލޫ ވެން ރައިން ހިމެނެ އެވެ.
މޯލްޑިވްސް ސްޕޯޓްސް އެވޯޑްސް ހަފްލާ އޮންނާނީ މާދަމާރޭ 20:30 ގައި ކުޅިވަރު އެކުވެނި ދަނޑުގަ އެވެ.
