ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީގެ ކައުންސިލުން ފާސްކުރަން ޓްރާންސްޕޯޓް މިނިސްޓަރު އަދި ޖޭޕީގެ ނައިބު ލީޑަރު އައިޝަތު ނަހުލާ ވޯޓު ދެއްވައިފި އެވެ.
ރިޔާސީ އިންތިހާބުގައި އެ ޕާޓީގެ ލީޑަރު ގާސިމް އިބްރާހިމް ވާދަކުރައްވަން ނިންމާފައިވަނީ މިއަދު ބޭއްވި ކައުންސިލް ބައްދަލުވުމުގަ އެވެ. މި ބައްދަލުވުމުގައި ދެ ކަމަކަށް ވަނީ އަތް އުފުލައިގެން ވޯޓަށް އަހައިފަ އެވެ.
ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެހި ވޯޓުގައި އެގޮތަށް ވާދަކުރަން ނުފެންނަ ކަމަށް ރައީސް އޮފީހުގެ މިނިސްޓަރު އަހުމަދު ސަމީރު ވޯޓު ދެއްވި އެވެ. އެއާއެކު ކެބިނެޓްގައި ހިމެނިވަޑައިގަންނަވާ ގާސިމްގެ އަނބިކަނބަލުން ނަހުލާ ވެސް އެގޮތަށް ވޯޓު ދެއްވި ކަމަށް އަޑު ފެތުރުނެވެ.
ނަމަވެސް, ޖޭޕީން އެކަން ދޮގުކުރެ އެވެ.
އެ ޕާޓީން އާންމު ކޮށްފައިވާ ވޯޓު ވަގުތުގެ ވީޑިއޯއިން ވެސް ނަހުލާ އަތް ނަންގަވައިގެން އިންނަވާ މަންޒަރު ފެނެ އެވެ. ނަހުލާ އަތް ތިރި ކުރައްވަނީ ވޯޓު ގުނައި ނިމެން ކައިރިވެފައިވަނިކޮށެވެ.
ނަހުލާ ވޯޓު ދެއްވީ ގާސިމް އިންތިހާބުގައި ވާދަކުރަން ފެންނަ ކަމަށް--
ރައީސް ސޯލިހާ އެކު ކޯލިޝަންގައި ދެމި އޮންނަން ފެނޭތޯ އެހި ވޯޓުގައި އެކަމަށް ފެންނަ ކަމަށް ވޯޓު ދެއްވެވީ ސަމީރު އެކަންޏެވެ.
ޖުމްހޫރީ ޕާޓީން މިގޮތަށް ނިންމާފައިމިވަނީ އެމްޑީޕީގެ ރިޔާސީ ކެންޑިޑޭޓް, ރައީސް އިބްރާހިމް މުހައްމަދު ސޯލިހުއާ އެކު ކޯލިޝަންގެ ތެރޭން އިންތިހާބުގައި ވާދަކުރުމަށް އެ ޕާޓީއަށް ރަސްމީކޮށް ދައުވަތުދީ, ރައީސް, ގާސިމްއާ ބައްދަލު ވެސް ކުރައްވާފައިވަނިކޮށެވެ.
މިހާރު ވެރިކަން ކުރާ ކޯލިޝަން ތެރޭ ޖުމްހޫރީ ޕާޓީ ހިމެނޭއިރު, ނައިބު ރައީސް ފައިސަލް ނަސީމަކީ ވެސް ޖުމްހޫރީ ޕާޓީން ވަޑައިގެންނެވި ބޭފުޅެކެވެ. މިހާތަނަށް ރައީސްއާ އެކު ކޯލިޝަން ހަދަން އެއްބަސްވެފައިވަނީ އަދާލަތު ޕާޓީގެ އިތުރުން ވިޔަފާރިވެރިޔާ އަހްމަދު ސިޔާމްގެ މޯލްޑިވްސް ޑެވެލޮޕްމަންޓު އެލަޔަންސް (އެމްޑީއޭ) އާ އެވެ.
