އިރުމަތީ ޔޫކްރެއިންގެ ބަހްމޫތު ސިޓީގައި ރަޝިއާ އާއި ޔޫކްރެއިނަށް ވެސް ބޮޑު ގެއްލުންތަކެއް ލިބެމުންދާ ކަމަށް ރިޕޯޓުތައް ބުނެފި އެވެ.
ބަހްމޫތު ސިޓީގެ ކޮންޓްރޯލް ހޯދަން ރަޝިއާ ސިފައިން މަސައްކަތް ކުރާތާ ގިނަ މަސްތަކެއް ވެއްޖެ އެވެ. މިހާރު ހަނގުރާމައިގެ ހާލަތު އެންމެ ގޯސްކޮށް އޮތީ އެ ސިޓީގަ އެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ ކުޑަ ދުވަސްކޮޅެއްގެ ތެރޭގައި ރަޝިއާ ސިފައިންގެ 1100 އަށް ވުރެ ގިނަ މީހުން މަރުވެފައިވާ ކަމަށެވެ.
އޭގެ އިތުރުން ރަޝިއާ ސިފައިންގެ 1500 މީހުންނަށް ސީރިއަސް އަނިޔާތަކެއް ލިބި، ހަނގުރާމައިގެ އިތުރަށް ބައިވެރިނުވެވޭނެ ކަމަށް ވެސް ޒެލެންސްކީ ވިދާޅުވި އެވެ.
ރަޝިއާއިން ބުނީ ފާއިތުވި 24 ގަޑިއިރުގެ ތެރޭގައި ޔޫކްރެއިން ފައުޖުގެ 220 މީހުން މަރުވެފައިވާ ކަމަށެވެ.
ބައެއް އެނެލިސްޓުން ބުނާ ގޮތުގައި އެއީ ސްޓްރެޓެޖިކް ގޮތުން ބަލާއިރު ރަޝިއާއަށް މާ ބޮޑު ފައިދާތަކެއް ލިބޭނެ ސިޓީއެއް ނޫނެވެ.
އެހެން ނަމަވެސް ރަޝިއާގެ މައި ލަނޑުދަނޑިއަކީ ޔޫކްރެއިންގެ އިރުމަތީގައި އޮންނަ ޑޮނެސްކް ސަރަހައްދުގެ ފުރިހަމަ ކޮންޓްރޯލް ހޯދުމެވެ. އެހެންވެ، އެ ސަރަހައްދުން ސިޓީއެއްގެ ހިފިއްޖެ ނަމަ ވާނީ ކުރިއެރުމަކަށެވެ.
ހަނގުރާމައިގެ ކުރިން ގާތްގަނޑަކަށް 70،000 މީހުން ބަހްމޫތު ސިޓީގައި އުޅުނެވެ. ގިނަ ބަޔަކު އެ ސިޓީ ދޫކޮށް ދިޔަ ނަމަވެސް، އަދުވެސް ބައެއް މީހުން އެ ސިޓީ ދޫކޮށް ގޮސްފައެއް ނުވެ އެވެ.
