ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބަައި-އިލެކްޝަނުގައި އިދިކޮޅު ޕީޕީއެމްގެ ފަރާތުން ވާދަކުރާ ކެންޑިޑޭޓްގެ ގޮތުގައި ހުސައިން ރިޒާ ހަމަޖައްސައިފި އެވެ.
ހުސައިން ރިޒާއަކީ ކުރިން އެ މަގާމުގައި ހުންނެވި އިބްރާހީމް ރިޒާގެ ކޮއްކޮ އެވެ. ހުސައިން ރިޒާއަށް ޓިކެޓު ލިބުނީ، ޓިކެޓަށް ހުޅުވާލުމުން މުއްދަތު ހަމަވި އިރު ވެސް އެއްވެސް އެހެން މީހަކު ކުރިމަތި ނުލުމުންނެވެ.
ގުރައިދޫ ދާއިރާގެ ރައްޔިތުންގެ މަޖިލީހުގެ ގޮނޑި ހުސްވީ އެ ދާއިރާގެ މެންބަރު ކަމުގައި ހުންނެވި އިބްރާހިމް ރިޒާ, 55, މި މަހުގެ 23 ގައި އަވަހާރަވުމާ ގުޅިގެންނެވެ. ރިޒާ އަވަހާރަވީ ކެންސަރުގެ އާލާސްކަންފުޅުގައި މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ.
ފެހި ގާނޫނު އަސާސީގެ ދަށުން އެކުލަވާލި ތިން މަޖިލީހުގައި ވެސް ކ. ގުރައިދޫ ދާއިރާ ތަމްސީލް ކުރެއްވީ ރިޒާ އެވެ. އަދި އަށާރަވަނަ ރައްޔިތުންގެ މަޖިލީހުން، ޖުޑީޝަލް ސާވިސް ކޮމިޝަނަށް ކަނޑައެޅި މެންބަރަކީ ވެސް ރިޒާ އެވެ. އަދި އޭރު އެ ކޮމިޝަންގެ ނައިބު ރައީސް ކަން ވެސް ކުރެއްވި އެވެ.
ގުރައިދޫ ދާއިރާގައި ހިމެނޭ ރަށްތަކަކީ، ގުރައިދޫގެ އިތުރުން ކ. އަތޮޅު މާފުއްޓާއި އެ އަތޮޅު ގުޅި އެވެ.
މި އިންތިހާބުގައި އެމްއެންޕީ އަދި ވެރިކަން ކުރާ އެމްޑީޕީން ވެސް ވާދަކުރެ އެވެ. އެމްޑީޕީގެ ޓިކެޓު ހަތަރު މީހަކު ކުރިމަތިލުމުން އަންނަ ހޮނިހިރު ދުވަހު ޕްރައިމަރީ ބޭއްވުމަށް ނިންމާފައިވެ އެވެ.
ގާނޫނުއަސާސީގެ 78 މާއްދާގައި ބުނެފައިވާ ގޮތުން މެމްބަރެއްގެ ގޮނޑި ހުސްވާ ތާރީހުން ފެށިގެން ދެ މަސް ދުވަހުގެ ތެރޭގައި އެ ދާއިރާއެއްގެ ބައި އިލެކްޝަން ބާއްވަން ޖެހެ އެވެ.
