ރަޝިއާގެ ގޭސް ޔޫރަޕަށް ސަޕްލައިކޮށްދޭ ނޯޑް ސްޓްރީމް ހޮޅިތަކަށް މިދިޔަ ސެޕްޓެމްބަރު މަހު ދިން ހަމަލާތަކުގައި ޔޫކްރެއިން ބައިވެރިވި ކަމަށް ކުރާ ތުހުމަތު އެ ގައުމުން ދޮގުކޮށްފި އެވެ.
އެމެރިކާގެ ސިއްރު ޖާސޫސީ މަސްދަރުތަކާ ހަވާލަދީ ނިއު ޔޯކް ޓައިމްސް ނޫހުން ބުނީ އެ ހަމަލާގެ ފަހަތުގައި އޮތީ ޔޫކްރެއިންގެ ގްރޫޕެއް ކަމަށެވެ.
އެހެން ނަމަވެސް ޔޫކްރެއިންގެ ރައީސް ވޮލޮޑިމިރް ޒެލެންސްކީ އާއި އިސް އޮފިޝަލުން އެކަަމުގައި ބައިވެރިވިކަމުގެ ހެއްކެއް ނެތް ކަމަށް ވެސް އޮފިޝަލުން ނިއު ޔޯކް ޓައިމްސް ނޫހަށް ބުންޏެވެ.
ޔޫކްރެއިން ރައީސްގެ އިސް އެޑްވައިޒަރު މީކައިލޯ ޕޮޑޯލިޔަކް ވިދާޅުވީ ނިއު ޔޯކް ޓައިމްސްގައި ވަނީ ދޮގު ހަބަރެއް ކަމަށާއި އެކަމުގައި ޔޫކްރެއިންގެ އެއްވެސް ބައިވެރިވުމެއް ނެތް ކަމަށެވެ.
ޖަރުމަނުގެ މީޑިއާއިން ބުނީ ހޮޅިތައް ގޮއްވާލުމަށް ގޮވާ ތަކެތި ގެންގޮސް ބޭނުންކުރި ބޯޓު ތަހުގީގީ ޓީމުތަކުން ދެނެގަނެފައިވާ ކަމަށެވެ.
ނޯޑް ސްޓްރީމް ހޮޅިތައް ގޮއްވާލުމުގެ ކުރިން ގޭސް ސަޕްލައި ކުރުން އޮތީ މެދުކަނޑާލައިފަ އެވެ. ރަޝިއާއިން ނޯޑް ސްޓްރީމް ބަންދުކުރީ އޯގަސްޓު މަހު މެއިންޓެނަންސް މަސައްކަތަށެވެ. ނޯޑް ސްޓްރީމް 2 ގާއިމްކުރި ނަމަވެސް، ގޭސް ސަަޕްލައި ކުރަން އެ ހޮޅި ބޭނުންކޮށްފައެއް ނުވެ އެވެ.
ހޮޅިތައް ގޮވި ސީދާ ސަބަބު ނޭނގޭ ނަމަވެސް، ބޮޑަށް ބެލެވެނީ އެއީ ބަޔަކު ދިން ހަމަލާއެއް ކަމަށެވެ. ރަޝިއާއިން އެކަަމުގެ ތުހުމަތު ކުރީ ހުޅަނގުގެ ގައުމުތަކަށެވެ.
ނޭޓޯ އާއި ހުޅަނގުގެ ގައުމުތަކުން ވެސް ނުސީދާކޮށް ރަޝިއާއަށް ތުހުމަތު ކުރެ އެވެ. އީޔޫއިން ބުނީ އެ ގޭސް ހޮޅިތަކަކީ ހުޅަނގާ ދެކޮޅު ހަތިޔާރެއްގެ ގޮތުގައި ރަޝިއާއިން ބޭނުންކުރާ ކަމަށެވެ.
